SQO-da bilim berý salasynyń úsh laýazymdy tulǵasy jaýapkershilikke tartyldy
PETROPAVL. KAZINFORM – Soltústik Qazaqstan oblysynyń prokýrorlary bilim berý mekemelerinde eńbek etetin kásipkerlerdiń quqyqtaryn qorǵady.
SQO prokýratýrasy málim etkendeı, qadaǵalaýshy organ bilim berý salasynyń jumysyna taldaý júrgizip, nátıjesinde oqýshylardy tamaqtandyrýdy uıymdastyrý kezinde óreskel zań buzýshylyq jiberilgeni anyqtaldy. Osylaısha kásipkerlerdiń quqyǵy buzylǵan.
«Oblystyq bilim basqarmasynyń laýazymdy tulǵalary bıýdjet jáne salyq zańnamasynyń talaptaryn buza otyryp, bıýdjettik ótinimderdi daıyndaý kezinde mektepte bir rettik tamaqtandyrý qunyn esepteý kezinde qosylǵan qun salyǵynyń stavkasyn - 12% eskermegen. Kásipkerlerge tamaqtandyrýdy uıymdastyrǵandary úshin bir oqýshyǵa qajetti 647 teńgeniń ornyna 614 teńge mólsherinde tólem jasalǵan. Sonyń saldarynan mektepterde tamaqtandyrý qyzmetin kórsetetin 6 kásipkerdiń quqyqtary buzylǵan», - deıdi óńir prokýrorlary.
Qadaǵalaý organynyń aktisi boıynsha bıýdjettik ótinimderdi qalyptastyrý qaıta qaralyp, kásipkerlik sýbektilerimen qosymsha kelisimder jasaldy. Qarjylandyrý 5,6 mln teńgege ulǵaıtyldy.
Zań buzýshylyqqa jol bergen 3 laýazymdy tulǵa tártiptik jaýapkershilikke tartyldy.
Buǵan deıin SQO-da balabaqsha qyzmetkerleri ótirik bala sanyn kóbeıtip, bıýdjetten aqsha alyp kelgenin jazǵan edik.