SQO-da bıylǵy at jarysy maýsymy alaman báıgemen aıaqtaldy
SQO Beskól aýylynda ornalasqan «Qulager» ıppodromynda at jarysy maýsymynyń jabylýyna oraı aldymen, qazaqtyń ulttyq at sporty oıyndary kórsetildi. Solardyń biri – jamby atý. Mergendik pen eptilikti kórsetken qyz-jigitter, ejelden kele jatqan taǵy bir oıyn – «qyz qýýdy» da kelýshiler nazaryna usyndy.
«Dástúrli jazǵy at jarysy maýsymynyń jabylý saltanatyna oraı 9 túrli báıge uıymdastyrdyq. Tartysty dodaǵa oblys aýdandarynyń 40 sáıgúligi jáne Astanadan shabandozdar tulparlarymen kelip qatysyp otyr. Kóptegen jarystardyń jeńimpazy Orlov, amerıkalyq, orys tuqymdas tulparlar qatysyp jatyr. Ókinishke oraı, qatysýshylar sany az, óıtkeni maýsymnyń sońy, ári jaraqat alǵandary bar, sondaı-aq basqa oblystarda da maýsymnyń jabylýyna arnalǵan osyndaı jarystar ótip jatyr», - deıdi jarystyń bas tóreshisi Olga Patoshkına.
1600 metrlik ushqyr báıge, 7000 metrlik jorǵa jarys, 1600 metrlik 2 jastaǵy jelisti attardyń shabysy, 10 myń metrlik top báıge jáne maýsymnyń jabylýyn 15 km qashyqtyqty alaman báıge qorytyndylady.
1600 metrlik ushqyr báıgede aıyrtaýlyq Dmıtrıı Volkovtyń «Don svıft» atty úsh jasar tulpary qarsylastaryn shań qaptyrdy. Sáıgúlik márege 1 mınýt 37 sekýndta kelgen.
«Báıge tartysty ótti. Baq shaba ma, bap shaba ma degen osy. Bul bıylǵy maýsymdaǵy onyń ekinshi jarysy. Buǵan deıin Pavlodardaǵy dodada baq synadyq», - deıdi shabandoz.
10 myń metrlik top báıgede Ýálıhanov aýdanynyń «Juldyzy» birinshi bolyp kelse, 15 myń metrlik alaman báıgede Esil aýdanynyń «Kókterek» atty tulpary aldyna jan salmady.
