SQO-da bıylǵy astyq ónimine boljam jasaldy
PETROPAVL. QazAqparat - Soltústik Qazaqstan oblysynda astyq jınaý naýqany tamyz aıynyń sońynda bastalady, dep habarlaıdy QazAqparat.
SQO Aýyl sharýashylyǵy basqarmasynyń bastyǵy Qaırat Omarov óńirdiń kúzgi dalalyq jumystarǵa qanshalyqty daıyn ekendigin aıtyp berdi. Onyń aıtýynsha, dándi daqyldardyń 76% jaqsy jaǵdaıda, 24% qanaǵattanarlyq jaǵdaıda. Aýdandyq aýyl sharýashylyǵy basqarmalarynyń boljamyna sáıkes, oblys boıynsha dándi daqyldardyń ortasha ónimdiligi shamamen 15,7 ts/ga, maıly daqyldar - 9 ts/ga bolady.
«Jaz boıy jaýǵan jaýyn-shashyn jáne ozyq tehnologııalardy paıdalaný daqyldardyń qalypty damýy men mol ónimniń shyǵýyna múmkindik berdi», - dedi Q. Omarov.
Óńirdegi keıbir aýyl sharýashylyq qurylymdar egin jınaý naýqanyn bastap ketti. Jappaı jınaý naýqanyna soltústikqazaqstandyq sharýalar tamyzdyń aıaǵynda kirisedi.
Astyq jınaý naýqanyna 7,6 myń astyq jınaıtyn kombaın qoldanylady jáne bıyl agrarshylar jalpy quny 14 mlrd teńgege 895 jańa tehnıka (onyń ishinde 58 kombaın) satyp alǵan.
«Egin jınaýda astyq tasymaldaý logıstıkasy da óte mańyzdy. Sondyqtan aldyn-ala jetispeıtin kólikterdi aýdandaǵy tasymal kásiporyndarynan, Petropavl qalasynan jáne jeke sektordan tabý kerek», - dep atap ótti Qaırat Omarov.
Kúzgi dalalyq jumystar úshin memleket 75 myń tonna dızel otynyn bólgen.
Jalpy eseppen soltústikqazaqstandyq sharýalar 4,2 mln gektar aýmaqta egin orady, onyń 2,8 mln gektary - dándi daqyldar.
Avtor: Olesıa Jýkoven
