SQO-da bıyl jazǵy lagerlerde 9 myńnan astam bala tegin demalady
PETROPAVL. QazAqparat – Soltústik Qazaqstan oblysynda bıyl alǵash ret 300 daryndy balaǵa arnalǵan jazǵy saýyqtyrý lageri jumysyn bastamaq, dep habarlaıdy QazAqparat tilshisi.
Oblystyq bilim basqarmasy baspasóz qyzmetiniń málimetinshe, bıyl barlyq demalys lagerleri «Qazaqstan balalary - jazdy qýanyshqa toltyraıyq» atty taqyrypta jumys isteıdi. Qazir óńirde 13 saýyqtyrý demalys lageri bar. Olardyń barlyǵynda kúrdeli jáne aǵymdaǵy jóndeý jumysy júrgizilip jatyr.
«13 demalys lageriniń beseýi senimgerlik basqarýǵa berilgen. Solardyń bireýi – «Dostyq» lageri. Demalys maýsymyna daıyndaý úshin kásipker sý qubyryn, terezelerin aýystyryp jatyr. Barlyq lager jóndelip jatyr. Balalardy qaı kúnnen bastap qabyldaıtynymyz ázirge belgisiz», - deıdi SQO Bilim basqarmasynyń bólim basshysy Mafrýza Naýanova.
Óńirde 1-10 synyp aralyǵynda oqıtyn 66 myńnan astam oqýshy bar. Bıyl olardyń 98 paızy jazǵy saýyqtyrý lagerinde demalýy tıis. Toǵyz myńnan astam bala bıýdjet esebinen tegin demalmaq.
«Bizde az qamtylǵan jáne áleýmettik jaǵdaıy tómen otbasynan shyqqan, jetim jáne ata-ana qaraýynsyz qalǵan balalar 100 % jazǵy demalyspen qamtylady. Budan basqa 59 jasóspirimge respýblıkalyq «Býrabaı» demalys ortalyǵyna, 78 oqýshyǵa respýblıkalyq «Baldaýren» oqý-saýyqtyrý ortalyǵyna joldama beremiz», - deıdi Mafrýza Naýanova.
Qala syrtyndaǵy demalys oryndarynan basqa mektep janynda da lagerler jumys isteıdi. Ol jerde 40 myńnan astam bala jáne 176 shatyrly lager qurylyp, munda 5 myńnan astam oqýshy demalmaqshy.
Mafrýza Naýanovanyń aıtýynsha, oblysta bıyl alǵash ret daryndy balalarǵa arnalǵan jazǵy lager ashylmaq. Onda respýblıkalyq sporttyq, bilim saıystarynyń jeńimpazdary dem alady. Jospar boıynsha 300 bala qabyldanbaqshy.
