SQO-da bıyl janýarlardan zardap shekken 211 adamnyń jartysynan astamyn qańǵyrǵan ıt qapqan

PETROPAVL. QazAqparat – Soltústik Qazaqstan oblysynda bıyl janýarlar qaýyp, tyrnaǵan 211 adam dárigerlerdiń kómegine júgindi. Olardyń 56 % qańǵyǵan ıtten zardap shekken, dep habarlaıdy QazAqparat tilshisi.

Óńirlik kommýnıkatsııalar qyzmetinde SQO sanıtarııalyq-epıdemıologııalyq baqylaý departamentiniń basshysy Áset Jumataev qutyrma aýrýyna qatysty óńirdegi jaǵdaıǵa toqtaldy. Mamannyń aıtýynsha, belsendi profılaktıkalyq jumystyń arqasynda bul aýrý 1998 jyldan beri óńirde tirkelmegen. Alaıda odan keler qaýip joq emes.

«SQO – qutyrma aýrýynyń tabıǵı oshaǵy aımaǵynda ornalasqan. Qys-kóktemde qaýipti vırýsty ıt-mysyq, aýylsharýashylyq janýarlary jabaıy janýarlardan juqtyryp, eldi mekenderge ákelý jáne adamdarǵa juqtyrý qaýpi artady.

Qutyrma - asa qaýipti, ólimge ákeletin aýrý. Eger alǵashqy saǵattarda juqtyrǵan adamǵa qajetti kómek kórsetilmese, ol sózsiz óledi. Qutyrma - bul emdelmeıtin aýrý, ólim tynys alýdyń saldanýynan jáne júrek qyzmetiniń tómendeýinen bolady. Adam sanasyn joǵaltpaı, azaptanyp óledi», - deıdi Áset Jumataev.

Qaýipti aýrý adamdarǵa negizinen aýrý janýarlar qapqan kezde silekeıimen juǵady.

«Osy jyldyń 1 toqsanynda oblys boıynsha 211 adam antırabııalyq kómekke júgindi, byltyr osy aralyqta 176 adam dárigerge qaraldy.

Qańǵybas ıtterdiń kóbeıýine baılanysty olardan zardap shekken turǵyndardyń da qatary artqan. 119 adamdy nemese 56,3% ıt qaýyp, tyrnaǵan. 71 adam mysyqtan, sondaı-aq 10 adam egeýquıryqtan, 4 turǵyn iri qara maldan, 3 adam túlkiden, 2 adam jylqydan zardap shekti jáne 2 adamdy tıin tistegen», - deıdi basqarma basshysy.

Qutyrmaǵa qarsy em joq. Aýrýdy tek vaktsınatsııa arqyly boldyrmaýǵa bolady. Janýarlardan zardap shekkenderdiń barlyǵyna antırabııalyq egýler jasaldy.