SQO-da bıyl VICh-pen kúreske 290 mıllıon teńge jumsaldy
PETROPAVL. QazAqparat – Soltústik Qazaqstan oblysynda bıyl VICh ınfektsııasymen kúresýge 290 mln teńge jumsalsa, onyń 185 mln teńgesi antıretrovırýsqa qarsy preparattardy satyp alýǵa bólindi, dep habarlaıdy QazAqparat tilshisi.
«Áleýmettik medıtsınalyq saqtandyrý qory» KEAQ SQO fılıaly taratqan málimet boıynsha, antıretrovırýsqa qarsy preparat vırýstyń kóbeıýin tejep, ımmýndyq júıeniń buzylýyn toqtatady, ómir súrý uzaqtyǵyn ulǵaıtyp, syrqattyń jalpy densaýlyq jaǵdaıyn jaqsartady.
2020 jyldan bastap qazaqstandyqtar medıtsınalyq qyzmetti eki paket boıynsha alady. Tegin medıtsınalyq kómektiń kepildik berilgen kólemi halyq úshin eń tómengi áleýmettik standart, al mindetti áleýmettik medıtsınalyq saqtandyrý - ár saqtandyrylǵan qazaqstandyqtyń ómir súrý sapasyn jaqsartýǵa baǵyttalǵan medıtsınalyq kómektiń qalǵan tizbesin qamtıdy.
VICh – áleýmettik mańyzy joǵary aýrýlardyń tizimine kiredi, osy sanattaǵy naýqastar tegin medıtsınalyq kómektiń kepildik berilgen kólemi sheńberinde emdeledi. Eki jyldan beri bul dertpen kúreske qajetti qarajat medıtsınalyq saqtandyrý qory esebinen bólinip keledi.
Adamnyń ımmýnıtet tapshylyǵynyń vırýsyn juqtyrǵandardy dıagnostıkalaý, aldyn alý jáne emdeý úshin bıyl oblysta 290 mln teńge bólindi. Bul qarajattyń 64% - 185 mln teńge antıretrovırýstyq preparattardy satyp alýǵa jumsaldy.
Bıylǵy on aıda óńirde VICh-ınfektsııany juqtyrǵan 165 adam tirkeldi. Olardyń 124-i oblys ortalyǵynda, 40-y aýdandarda turady, al bireýi Reseı Federatsııasynyń azamaty. Dertti juqtyrǵandardyń basym bóligi – 139 jaǵdaı 20-49 jastaǵy turǵyndar.
Mamandardyń sózine qaraǵanda, aýyratyn naýqastardyń jartysynan astamy jumys istemeıdi. VICh kóbine esirtki quraldary men psıhobelsendi zattardy tutyný saldarynan juǵady eken.
