SQO-da bıyl tumaýǵa qarsy vaktsınatsııa eki apta erte bastaldy
PETROPAVL. QazAqparat – Soltústik Qazaqstan oblysynda búgin tumaýǵa qarsy vaktsınatsııa bastaldy. Osy maqsatta 52 mln teńgege reseılik arnaıy preparat satyp alynǵan, dep habarlaıdy QazAqparat tilshisi.
SQO taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, óńirde maýsymdyq tumaýǵa qarsy ekpe eki aptaǵa erte, ıaǵnı búginnen bastaldy. Bul aýrýǵa qarsy ımmýnıtetti ýaqytynda qalyptastyrýǵa múmkindik bermek.
Mamandardyń aıtýynsha, byltyr epıdemıologııalyq maýsymda oblysta tumaýdyń 434 jaǵdaıy tirkeldi. Onyń 68,4% - A tıpti tumaý.
«Búkilálemdik densaýlyq saqtaý uıymy halyqtyń 10%-na tumaýǵa qarsy ekpe jasaýǵa keńes beredi. SQO-da bul kórsetkish - 10,7%. Búginge deıin reseılik «Grıppol plıýs» vaktsınasynyń 60 myń 293 danasy alyndy. Oǵan 52 mln teńge jumsaldy», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Tatıana Gorlova.
Ekpe óz nátıjesin 8-12 kúnnen keıin berip, áseri bir jylǵa deıin saqtalady. Vaktsınany 6 aılyq balaǵa da qoıýǵa bolady. Alaıda ekpeni aýyrǵan kezde, sozylmaly aýrýlar asqynǵan ýaqytta qoıýǵa bolmaıdy. Sonaı-aq taýyq aqýyzyna allergııasy bar adamdarǵa da qarsy kórsetim bar.
«Óńirde 8 myńnan astam medıtsınalyq qyzmetker, emdeý mekemelerinde tirkeýde turǵan 4 myńnan astam bala, jıi aýyratyn, alty aıdan asqan 5 myńnan astam bala, balalar úıleriniń, jetim jáne ata-ana qaraýynsyz qalǵan balalarǵa arnalǵan mekeme tárbıelenýshileri, medıtsınalyq-áleýmettik mekeme qyzmetin alatyndar, ekinshi jáne úshinshi trımestrdegi júkti áıelder, júrek-qan tamyrlary jáne tynys alý músheleriniń sozylmaly aýrýlary barlar tegin vaktsınatsııadan ótedi. Budan basqa epıdemıologııalyq kórsetkish boıynsha 18,5 myńǵa jýyq adamǵa da ekpe tegin jasalady», - deıdi Tatıana Gorlova.
