SQO-da bıyl sýǵa shomylý maýsymynda 5 adam qaza tapty
PETROPAVL. QazAqparat – Soltústik Qazaqstan oblysynyń qutqarý qyzmeti sýǵa shomylý maýsymyn qorytyndylady. Osy aralyqta 23 adam qutqarylsa, 5 adamnyń, sonyń ishinde bir balanyń ajaly sýdan boldy, dep habarlaıdy QazAqparat tilshisi.
Óńirde sýǵa shomylý maýsymy 1 maýsym bastalyp, 31 tamyz resmı aıaqtaldy.
SQO tótenshe jaǵdaılar departamentiniń málimetinshe, osy aralyqta qutqarýshylar 4 ret súńgýirmen izdeý, 23 ret sýda qutqarý jumysyn atqaryp, 2 myńnan astam reıd ótkizdi. Nátıjesinde 23 adam, sonyń ishinde 3 balanyń ómirine arasha tústi.
«Sýdaǵy oqys oqıǵalardyń aldyn alý maqsatynda tıisti jumystar júrgizilgenimen, adam ólimimen aıaqtalǵan jaǵdaılar tirkeldi. Olardyń barlyǵy sýda shomylýǵa ruqsat etilmegen jerlerde bolǵan. Esil aýdanynda bir adam sý aıdynyna qulap qaza tapty, Qyzyljar aýdanynda bir bala, Petropavlda jáne Ǵ.Músirepov atyndaǵy aýdanda bir-bir adamnan shomylý kezinde sýǵa ketken. Qyzyljar aýdanynda bir adam sýǵa ketýshini qutqarý barysynda ózi qaza tapty», - deıdi SQO TJD bastyǵynyń orynbasary Murat Qanǵojınov.
Mamannyń aıtýynsha, sýǵa shomylý maýsymy aıaqtalǵanymen sý aıdyndaryna jyldyń qaı mezgilinde bolmasyn demalýǵa baratyndar jáne balyq aýlaýǵa shyǵatyndar kóp. Demalystyń arty qaıǵyly aıaqtalmaýy úshin qarapaıym qaýipsizdik erejelerin umytpaǵan jón. ıAǵnı qutqarý keýdeshesin kıip, qaıyqtyń bútindigine kóz jetkizip sýǵa túsý kerek.
Sońǵy bes jylda SQO-da balyq aýlaý kezinde 15 adam sýǵa ketken.
