SQO-da bıyl shartty túrde merziminen buryn bosatylǵan 21 adam qaıta qamaýǵa alyndy
SQO polıtsııa departamenti baspasóz qyzmetiniń málimetinshe, óńir polıtseıleriniń esebinde shartty túrde merziminen buryn bosatylǵan 241 adam bar. Sot olarǵa birqatar mindet júktegen: ishki ister organdarynyń ruqsatynsyz eldi mekennen shyqpaý, úıde saǵat 22.00-den tańǵy 06.00-ge deıin bolý, udaıy tirkeýge kelip turý, spırttik ishimdikterdi jáne basqa da tyıym salynǵan zattardy qabyldamaý. Olardyń oryndalýyn ýchaskelik polıtsııa ınspektorlary baqylaıdy. Tártipti jıi buzǵandar qaıta túrmege qaıtarylady.
Máselen, 31 jastaǵy petropavldyq 2019 jyly shartty túrde merziminen buryn bosatyldy. Bastapqy kezde ol shekteýlerdi buljytpaı oryndaǵan, alaıda, ýaqyt óte kele maskúnemdikke salynǵan. Ýchaskelik polıtsııa ınspektory onyń mas kúıde júrgenin birneshe ret tirkegen, alaıda eskertýlerdi er adam elemegen. Birde aşy sýdyń býymen otbasynda janjal shyǵarǵan. Onymen birge turatyn áıel polıtsııaǵa aryzdanǵanymen, keıin sot-medıtsınalyq saraptamadan ótýden bas tartypty. Deı turǵanmen, bul fakti sotta eskerildi.
Aıta ketetini, er adam aýyr dene jaraqatyn salǵany úshin sottalǵan. Ýchaskelik polıtsııa ınspektorlary shartty túrde merziminen buryn bosatý rejımin buzý týraly materıal jınastyryp, sot shartty túrde merziminen buryn bosatý rejıminiń kúshin joıý týraly usynymdy qanaǵattandyrdy. Kórsetilgen senimdi aqtaı bilmegen qylmysker qalǵan jazasyn túrmede ótemek.
«Shartty túrde merziminen buryn bosatý talaptaryn buzýdyń eń jıi kezdesetini – túngi ýaqytta úıde bolmaý, ishki ister organdaryna tirkelýge kelmeý. Quqyq buzýshylar tabys tabý úshin ruqsatsyz ýaqytta kóshege shyǵýǵa týra keldi dep ózderin aqtap jatady. Alaıda, oqý oqyp, jumys isteýge ruqsat bar. Ol úshin tek ruqsat alý qajet. SQO-da jyl basynan ýchaskelik ınspektorlar jınaǵan materıaldardyń negizinde shartty túrde merziminen buryn bosatý rejımin buzǵan 21 quqyq buzýshy bas bostandyǵynan aıyrý ornyna qaıtaryldy», – deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.