SQO-da bıyl Prezıdent shyrshasy onlaın formatta ótedi
SQO bilim basqarmasynyń basshysy Gúlmıra Kárimova brıfıngke qatysyp, mektepterde Jańa jyl merekesine arnalǵan is-sharalardyń ótý tártibine toqtaldy.
Bıyl dástúrli Prezıdenttik shyrsha 24 jeltoqsanǵa josparlanǵan.
Saǵat 11.00-de bastalatyn «Ǵajaıypqa toly Jańa jyl!» atty merekelik erteńgilik onlaın ótetindikten, ony oblystyq telearna jáne áleýmettik jeliler arqyly barlyq bala tamashalaýǵa múmkindik almaq.
«Prezıdent Ákimshiliginiń usynysyn eskere otyryp uıymdastyramyz. Memleket basshysynyń atynan 200 balaǵa syılyq tabystalady. Olar: jetim balalar, az qamtylǵan jáne kóp balaly otbasylardyń balalary, erekshe bilim berýdi qajet etetin, múgedek, sondaı-aq, sportta, bilimde daryndy, shyǵarmashylyqta nemese qoǵamdyq ómirde belgili bir jetistikke jetken balalar. Aıaz Ata men Aqshaqar ár jetkinshekke baryp, syılyqty saltanatty túrde tabys etedi. Búginde syılyqtar ázir, merekelik baǵdarlama daıyn», - deıdi Gúlmıra Kárimova.
Oqýshylardy Prezıdent atynan óńir basshysy Q.Aqsaqalov quttyqtaıdy. Keıin balalar jańajyldyq ertegini tamashalamaq.
Al 25 jeltoqsanda erteńgilikter aýdandar men Petropavlda ótpek.
«Barlyq mektepterdiń kezekshi synyptarynda jańajyldyq erteńgilikter shyrshanyń qasynda ótedi. Sanıtarlyq-epıdemıologııalyq talaptardy qatań saqtaı otyra uıymdastyramyz. 25 baladan artyq qatyspaıdy. Mektepke deıingi bilim berý mekemelerinde erteńgilikter keste boıynsha 21 jeltoqsannan bastalady. Anımatorlar men ata-analardyń qatysýyna ruqsat joq. Al qashyqtan bilim alyp jatqan balalarǵa Aıaz Ata men Aqshaqar beınequttyqtaý arnaıdy», - deıdi bilim basqarmasynyń basshysy.