SQO-da bıyl polıtsııanyń 21 qyzmetkeri teris qylyǵy úshin jumystan shyǵaryldy
SQO polıtsııa departamenti baspasóz qyzmetiniń málimetinshe, oblystyq polıtsııa vedomstvosynyń bastyǵy Marat Tólebaev jyldy qorytyndylap, onlaın rejıminde esep berdi. Ony Facebook áleýmettik jelisiniń qoldanýshylary polıtsııa departamentiniń resmı paraqshasynda kórip, ózderiniń saýaldaryn qoıa aldy.
Departament bastyǵynyń aıtýynsha, óńirde bıyl qylmys deńgeıi 23 %-ke tómendedi, byltyr 6 007 bolsa, jyl basynan 4 646 qylmys tirkelgen. Adam óltirý, densaýlyqqa zııan keltirý, qaraqshylyq, tonaý, urlyq pen bopsalaý kórsetkishteri tómen. Árbir úshinshi qylmys bótenniń múlkin urlaýǵa qatysty. Aımaqtyń bas polıtseıi jurttyń nazaryn sońǵy ýaqytta órshigen ınternet-alaıaqtyqqa aýdardy. Jol qaýipsizdigi máselelerine de toqtalyp, oblys turǵyndaryna kisi óltirý, densaýlyqqa aýyr zııan keltirý jáne buzaqylyq týraly aqparat berdi.
Oblysta árbir altynshy qylmys maskúnemdik saldarynan jasalady. Osyndaı qylmystardy boldyrmaý maqsatynda 9,5 myńǵa jýyq quqyq buzýshylyqtyń joly kesildi. Myńnan astam lıtr alkogol alynyp, spırttik ishimdikterdi zańsyz satýdyń 187 faktisi jáne spırttik ónimderdi satý talaptaryn buzýdyń 122 faktisi anyqtaldy. Jınalǵan materıaldar boıynsha sot 105 kásipkerlik sýbektisiniń alkogol ónimderin satý lıtsenzııasyn toqtatty. 136 adam májbúrli túrde emdelýge jiberildi.
Jeke quramnyń tártibi de nazardan tys qalmady. Jyl basynan beri 21 qyzmetker teris qylyǵy úshin jumystan shyǵaryldy, al olardyń tikeleı basshylary - túrli deńgeıdegi 60-tan astam basshy jaýapqa tartyldy.
Onlaın esep berý kezinde jeli qoldanýshylary tarapynan kóptegen suraqtar tústi. Esirtki saıttary jarnamasy profılaktıkasy, ýchaskelik polıtsııa pýnktimen baılanys, jol belgilerin ornatý, jaıaý júrginshiler ótkelderi, turǵylyqty mekenjaıy joq adamdarmen profılaktıkalyq jumystar qalaı júrgizilip jatqandyǵy jaıly suraqtarǵa Marat Tólebaev jaýap berdi.
Aıta keteıik, Marat Tólebaevtyń Facebook-taǵy jeke paraqshasyna 5 myńdaı adam tirkelgen.
