SQO-da bıyl pııaz shamamen eki ese, qant pen kartop 1,5 ese qymbattaǵan

PETROPAVL. QazAqparat – Soltústik Qazaqstan oblysynda áleýmettik mańyzy bar azyq-túlik taýarlarynyń baǵasyn ustap turý úshin turaqtandyrý qoryn qarjylandyrý 1,9 mlrd teńgeden 3,4 mlrd teńgege deıin ulǵaıtyldy, dep habarlaıdy QazAqparat tilshisi.

«Amanat» partııasy Soltústik Qazaqstan fılıalynyń janyndaǵy óńirlik damý jónindegi qoǵamdyq keńes múshelerine kásipkerlik jáne ındýstrııalyq-ınnovatsııalyq damý basqarmasynyń ókili esep berdi.

Mamannyń aıtýynsha, búginde turaqtandyrý qorynda 2 444 tonna ónim bar. Jyl basynan beri baǵasy eń kóp ósken ónimderdiń biri – pııaz, ol 190,4 %-ǵa, sondaı-aq qant 160,5 %-ǵa, kartop 149,1 %-ǵa qymbattaǵan. Ortasha statıstıkalyq baǵanyń ózgerýine óndirýshi kásiporyndardyń satyp alý baǵasyn arttyrýy sebep bolǵan.

«Osy aıda «Soltústik» ÁKK Kóksý qant zaýytynan 204 tonna, Taraz qant zaýytynan 816 tonna qant jetkizýge kelisim-shart jasasty. Kelisin 450 teńgeden alyp jatyr. Birinshi vagon shilde bitkenshe jetkiziledi. «Radýga» JShS «Azyq-túlik korporatsııasy» UK» AQ arqyly 136 tonna mólsherinde qant satyp aldy, kóterme baǵasy 500 teńge. Bul bizge jetpeıdi, biz Belarýsten qant taptyq, biraq onyń baǵasy qymbat – 560 teńge», - dedi kásipkerlik jáne ındýstrıaldy-ınnovatsııalyq damý basqarmasy basshysynyń orynbasary Danııar Isaev.

Sondaı-aq, Jambyl oblysynan 66 tonna erte pisetin pııaz satyp alyndy. Kókónis baǵasynyń maýsymdyq ósýine baılanysty Aqmola oblysynan kartop tikeleı jetkiziledi. Ońtústik óńirlerden pııaz satyp alý boıynsha kelissózder júrgizilip jatyr.

Danııar Isaevtyń aıtýynsha, óńirde turaqtandyrý qorynyń 26 saýda orny bar. Máselen qazir turaqtandyrý qorynyń dúkenderi arqyly kartop 120 teńgeden satylýda.