SQO-da bıyl ózen-kólderdiń mańynda spırttik ishimdik ishken 130 adam jazalandy
PETROPAVL. QazAqparat – Soltústik Qazaqstan oblysynda qutqarýshylar jyl basynan beri ózen-kólderge 4,5 myńnan astam reıd uıymdastyryp, aldyn alý jumystaryn júrgizdi. Sý qoımalarynyń mańynda spırttik ishimdik ishken 130 adam ákimshilik jaýapkershilikke tartyldy, dep habarlaıdy QazAqparat tilshisi.
SQO Tótenshe jaǵdaılar departamenti bastyǵynyń orynbasary Dmıtrıı Rastıhın oblystyq ákimdiktiń otyrysynda sýǵa shomylý maýsymyn qaýipsiz ótkizýge qatysty atqarylyp jatqan jumystar jaıynda málim etti.
«Oblysta 60 ózen, 2 148 kól, 117 qazanshuńqyr bar. Sonyń tek 12 kóli men Esil ózeninde 58 sýǵa shomylý orny daıyndaldy. Bıyl pandemııaǵa baılanysty shekteýler joq, sol sebepti ózen-kólderdiń basynda, demalys oryndarynda demalýshylar kóp bolady dep boljap otyrmyz. Ádette kún ysysymen sýda jaraqattanatyndar jáne sýǵa ketetinder sany artady», - deıdi Dmıtrıı Rastıhın.
Mamannyń aıtýynsha, sońǵy 9 jylda óńirde 211 adam, sonyń ishinde 33 bala sýǵa ketken. Osy aralyqta 250 adam qutqarylǵan.
Oqys oqıǵalardyń aldyn alý maqsatynda qutqarýshylar polıtseılermen, bilim basqarmasynyń mamandarymen, volonterlermen birge jyl basynan beri 4,5 myńnan astam reıd uıymdastyrdy. Maqsat – eskertý. Sondaı-aq ózen-kólderdiń mańynda spırttik ishimdik ishken 130 adam ákimshilik jaýapkershilikke tartyldy.
«SQO-ǵa ystyq kúnder keldi. Sondyqtan turǵyndar sýǵa shomylýǵa barǵanda, demalysta qarapaıym qaýipsizdik erejelerin umytpasa eken deımiz. Óńirdegi Esil ózeni, sondaı-aq halyq kóp baratyn Pestroe, Solenoe, Lebıaje, Úlken Torańǵul, Shalqar jáne Imantaý kólderi qaýipti sý qoımalarynyń qatarynda. Desek te, sońǵy jyldary sýǵa ketý jaǵdaılary kóbine ruqsat etilmegen ózen-kólderde tirkeledi», - deıdi departament bastyǵynyń orynbasary.
Esterińizge salaıyq, mamyr aıynyń sońynda Esil aýdany Pokrovka eldi mekeni mańyndaǵy Esil ózenine elýler shamasyndaǵy er adam sýǵa ketken edi. Onyń denesi tek bir aptadan keıin ǵana tabyldy.
