SQO-da bıyl órtten 31 adam mert bolyp, 34-i kúıip qaldy
PETROPAVL. QazAqparat – Soltústik Qazaqstan oblysy tótenshe jaǵdaılar departamenti óńirlik kommýnıkatsııalar qyzmetinde brıfıng ótkizip, órtke qatysty qazirgi jaǵdaıǵa toqtaldy, dep habarlaıdy QazAqparat tilshisi.
SQO TJD bastyǵynyń orynbasary Oral Ábdirahmanovtyń aıtýynsha, jyl basynan oblys aýmaǵynda 365 órt boldy, materıaldyq shyǵyn 144 mln teńgege jýyq.
Órtten 31 adam qaza tapty, 34 adam jaraqat aldy. Bul – ótken jylmyn salystyrǵanda kóp.
Órtke qaýipti kezeń bastalýymen shóp, qamys pen qoqystyń janýyna qatysty 600-den astam shaqyrtý túsken. 16 orman órti jáne 500 ga jýyq dala alqaby janyp, 38 órt tirkelgen.
«Oblysta 47 mobıldi top qurylǵan. Olar 448-den astam reıdtik is-shara ótkizdi. Nátıjesinde 94 adam ákimshilik jaýapkershilikke tartyldy, onyń ishinde 1 adamǵa 65 632 teńge aıyppul salyndy», - deıdi Oral Ábdirahmanov.
Oblys órt qaýpi joǵary aýmaqta ornalasqan 67 eldi meken, 15 saýyqtyrý lageri, 41 demalys aımaǵy bar. Órt sóndirýshiler balalardyń saýyqtyrý lagerlerin esepke aldy.
Onyń úsheýi erekshe tártip boıynsha tekserildi.
Tekserý qorytyndysy prokýratýra organdaryna, jergilikti atqarýshy organdarǵa, sondaı-aq oblystyq bilim basqarmasyna jiberildi.
«Halyqty aldyn alý is-sharalarymen qamtý, sondaı-aq halyqtyń azamattyq jaýapkershiligin jáne qaýipsiz minez-qulyq mádenıetin qalyptastyrý maqsatynda, bıyl 24-29 mamyr aralyǵynda oblys aýmaǵynda departament qyzmetkerleri «Tabıǵatty órtten qorǵaımyz!» keń kólemdi respýblıkalyq aktsııany ótkizdi. Oǵan orman sharýashylyǵy jáne janýarlar dúnıesi aýmaqtyq ınspektsııasynyń, tabıǵı resýrstar jáne tabıǵat paıdalanýdy retteý basqarmasynyń qyzmetkerleri men volonterlik uıymdar qatysty», - deıdi departament basshysynyń orynbasary.
