SQO-da bıyl órtten 28 adam mert bolyp, 97 mln teńge shyǵyn keldi
PETROPAVL. QazAqparat – Soltústik Qazaqstan oblysynda órtke qaýipti maýsym bastalǵaly órt shyǵýy jıiledi. Sońǵy 10 kúnniń ishinde óńirde 29 órt tirkeldi, dep habarlaıdy QazAqparat tilshisi.
SQO tótenshe jaǵdaılar departamentiniń málimetinshe, jyl basynan SQO-da 235 órt tirkeldi. Byltyr osy aralyqta 16 adam mert bolsa, bıyl 28 adam qaza tapty.
34 turǵyn túrli dene jaraqatyn aldy. Kelgen materıaldyq shyǵyn 97 mln teńgeden asady. Barlyq órttiń 75 % jáne qaza tapqandardyń 27-si - jeke sektorda bolǵan.
23 sáýir men 3 mamyr aralyǵynda SQO aýmaǵynda 29 órt tirkeldi. Mamandardyń aıtýynsha, órtke qaýipti maýsym 12 sáýirden bastaldy.
Osy ýaqyttan bastap kepken shópti, qamysty, qoqysty kúıdirýden týǵan órtke qatysty 227 shaqyrtý túsken.
Otty abaısyz qoldaný saldarynan, ıaǵnı qoqys pen kepken shópti kúıdirip, ol jaqyn mańdaǵy qurylys nysandaryna taralǵan 7 órt tirkeldi.
«Alda birneshe kún mereke, demalys. Turǵyndar saıajaı ýchaskelerine, demalý úshin ormanǵa, tabıǵat aıasyna aǵylady. Árıne káýap daıyndaıdy. Káýap daıyndaǵan ýaqytta mindetti túrde qaýipsizdik erejelerin saqtaýǵa shaqyramyz. Jaqynda ata-analar kúni bolady, halyq zıratqa jınaýǵa barady. Zırat basynda ot jaǵyp, qoqysty kúıdirýge qatań túrde tyıym salamyz», - deıdi SQO TJD basqarmasynyń bastyǵy Dmıtrıı Rastıhın.
SQO-da órtke qaýipti maýsymnyń bastalýyna oraı 46 mobıldi top quryldy.
Oǵan 230 adam – azamattyq qorǵanys organdarynyń ókilderi, jergilikti polıtsııa qyzmetinen, orman sharýashylyqtary men jergilikti atqarýshy bılikten mamandar kirgen.
Olar júrgizgen reıd barysynda 20-dan astam ákimshilik hattama toltyryldy.
