SQO-da bıyl «Nurly jer» baǵdarlamasy boıynsha 185 otbasy jańa baspanaǵa ıe boldy

PETROPAVL. QazAqparat – Soltústik Qazaqstan oblysynda bıyl 185 otbasy «Nurly jer» baǵdarlamasy aıasynda jańa baspanaǵa ıe bolsa, oblys ortalyǵyndaǵy Solnechnyı-2 shaǵynaýdanynda boı kótergen taǵy 200 jeke turǵyn úı paıdalanýǵa berilýge ázir, dep habarlaıdy QazAqparat tilshisi.

SQO-da bıyl «Nurly jer», «Baqytty otbasy» jáne «Áskerı ónim» memlekettik baǵdarlamalary boıynsha jyl basynan 988 otbasy turǵyn úı jaǵdaıyn jaqsartty.

«Oblysta ásirese «Baqytty otbasy» jáne «Áskerı ónim» baǵdarlamalary turǵyndar arasynda suranysqa ıe. «Baqytty otbasy» baǵdarlamasy kóp balaly jáne tolyq emes otbasylardy, múgedek balalardy tárbıelep otyrǵan otbasylardy qoljetimdi baspanamen qamtamasyz etýge baǵyttalǵan. Oblysta osy baǵdarlamamen 1 012,4 mln teńge somasyna 110 qaryz berildi, sondaı-aq 404 mln teńge somasyna taǵy 45 ótinim bekitildi», - deıdi «Qazaqstannyń turǵyn úı qurylys jınaq banki» AQ SQOF dırektory Almas Japabaev.

«Baqytty otbasy» baǵdarlamasy aıasynda qaryz jyldyq 2% stavka boıynsha 19 jylǵa deıingi merzimge beriledi. Tek satyp alatyn páter 10 mln teńgeden aspaýy jáne qaryz somasynyń 10% bastapqy jarnasy qaltańyzda bolýy kerek.

«Áskerı ónim» baǵdarlamasy 2019-2025 jyldarǵa shaqtalǵan. Jyl saıyn elimizde 4 myńǵa jýyq áskerı qyzmetshige men memlekettik qaýipsizdik qyzmetiniń qyzmetkerlerine páter alýǵa múmkindik beredi. SQO-da bıyl 123 adam osy baǵdarlama arqasynda baspanaly boldy.

Al, «Nurly jer» baǵdarlamasy boıynsha 185 otbasy jańa páterge kirgen. Sondaı-aq Petropavl qalasy mańyndaǵy Solnechnyı-2 yqshamaýdanynda 200 jeke turǵyn úı salyndy.

«Memlekettik baǵdarlamalarǵa qatysýshylarǵa «Jasórken» shaǵynaýdanynda 192 páterli turǵyn úı jáne Jýkov kóshesinde 78 páterli turǵyn úı salynyp jatyr. Úılerdegi barlyq páterlerdiń 1 sharshy metri 140 myń teńgege baǵalanǵan. Memlekettik baǵdarlamalardyń negizgi operatorlarynyń biri «Qazaqstannyń turǵyn úı qurylys jınaq banki» oblystyq fılıaly jalpy 16 jyldyń ishinde 4 myńnan astam turǵynnyń úı-jaıyn jaqsartýǵa kómegi tıdi», - deıdi fılıal dırektory.

Mamandardyń málimetinshe, SQO-nyń turǵyn úı qory 11 990,4 myń sharshy metrdi quraıdy, onyń 43%-ǵa jýyǵy 1970 jylǵa deıin salyndy, ıaǵnı qoldanysqa berilgenine jarty ǵasyrdan asyp ketken. Oblysta 160 úı apatty dep tanylsa, onda 1 209 adam turyp jatyr.