SQO-da bıyl náreste ólimi tómendedi
PETROPAVL. QazAqparat – Soltústik Qazaqstan oblysynda byltyr 58 náreste kóz jumsa, bıyl 47 sábı shetinedi, dep habarlaıdy QazAqparat tilshisi.
Óńirde óli týǵan sharanalar sany da byltyrǵymen salystyrǵanda 48-den 32-ge deıin azaıǵan. Densaýlyq saqtaý basqarmasynyń jetekshisi Tımýr Sultanǵazıevtiń málimetine qaraǵanda, bıyl ana ólimine jol berilmegen. Alaıda oblysta bala týý kórsetkishi tómendep ketken. Byltyr ómirge 5152 náreste kelse, bıyl 4883 sábı dúnıe esigin ashty.
«Sábı ólimi 17% kemidi. Alaıda oblystyń kórsetkishi respýblıkalyq deńgeıden 0,8% artyq. Sábı óliminiń 72,7%, ıaǵnı basym bóligi perınataldyq kezeńdegi jaǵdaıǵa baılanysty. Týa bitken aýrýlardan bolatyn náreste óliminiń úlesi azaıdy», - dedi Tımýr Sultanǵazıev.
Basqarma jetekshisiniń sózine qaraǵanda, oblysta ekiqabat áıelderdiń bosaný merzimine qaraı, patologııanyń bolý-bolmaýyna baılanysty medıtsınalyq kómek berý deńgeıi jáne qajet bolǵan jaǵdaıda barlyq emdeý mekemeleri arasynda ózara áreket etý durys jolǵa qoıylǵan. Reanımatsııalyq keńes berý ortalyǵy jumys isteıdi. Bul ortalyqqa jyl basynan 176 adam habarlasyp, keńes alǵan. Sanıtarlyq avıatsııamen balalar reanımatologtary 68 ret, neonatologtar – 48, akýsher-gınekologtar 10 ret kómekke barǵan.
Budan basqa dárigerler únemi biliktilikterin arttyryp otyrady. Al perınataldyq mekemelerdiń materıaldyq-tehnıkalyq bazasyn nyǵaıtýǵa bıyl 333 mln teńge bólindi, bul byltyrǵydan shamamen 200 mln teńgege artyq.
