SQO-da bıyl myńnan astam adamdy ıt qapqan
PETROPAVL. QazAqparat – Soltústik Qazaqstan oblysynda bıyl 1071 adamǵa ıt-mysyq shabýyl jasap, saldarynan zardap shekkender medıtsınalyq kómek aldy, dep habarlaıdy QazAqparat tilshisi.
SQO taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, óńir - qutyrmanyń tabıǵı oshaǵy aımaǵynda tur. Saldarynan vırýstyń epızootııalyq belsendiligi artqan qys-kóktem mezgilderinde aýrý jabaıy janýarlardan ıt-mysyqtarǵa, aýylsharýashylyq janýarlaryna juǵady. Bul – óz kezeginde adamdarǵa qaýip ákeledi.
Bıyl oblysta turǵyndar arasynda qutyrma aýrýyn juqtyrǵandar tirkelgen joq. Byltyrlary Ǵ. Músirepov, Tımırıazev, Shal aqyn, Aqqaıyń aýdandarynyń aýmaǵynda biren-saran aýyrǵandar anyqtalǵan. Vırýs negizinen túlkiler jáne qarsaqtardan taraıdy eken.
Aýrý janýarlarda qozý, agressııa, silekeıiniń aǵýy túrinde bilinedi. Qutyrmasy bar ıtter jáne mysyqtar jıi adamdarǵa shabýyldaıdy, tamaqtan bas tartady. Itter aýrýdyń bastapqy kezeńinde belsendilik tanytpaıdy, tyǵylady, úıden qashýy múmkin. Qozý merzimi kezinde sýdan qorqýy, silekeıiniń aǵýy bilinbeıdi, biraq sal aýrýy damıdy.
Qutyrmanyń aldyn alýdyń eń basty joly - qańǵybas ıtter men mysyqtardyń sanyn qysqartý. Múmkindiginshe úı janýarlaryn qańǵybas ıtterge, jabaıy ańdarǵa jaqyndýyna jol bermeý, ıaǵnı baılap ustaý qajet. Sondaı-aq qutyrmaǵa qarsy aldyn alý egý jasaý da óz nátıjesin beredi.
«Adamdarǵa qutyrma aýrý janýar qapqan kezde silekeı arqyly juǵady. Nerv júıeleriniń joldarymen júrip, ortalyq nerv júıesin zaqymdaıdy. Aýrý birden syr bermeıdi, belgisi bir jyldan keıin de shyǵýy múmkin. Qutyrma - emdelmeıtin aýrý. Juqtyrǵan adamnyń tynys alý júıesi saldanyp, júrek qyzmeti báseńdeıdi. Adam azaptanyp qaıtys bolady. Aýrýdy tek vaktsınatsııalaý arqyly ǵana boldyrmaýǵa bolady», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń jetekshi mamany Nurgúl Moldaǵalıeva.
Bıyl medıtsınalyq kómekke janýarlar qapqan 1071 adam qaraldy. Qańǵybas ıtter men mysyqtardyń sanyn qysqartý is-sharalaryn júrgizýge jergilikti bıýdjetten 34 mln 099 myń teńge bólindi. Barlyǵy 100 98 qańǵybas janýar, sonyń ishinde 9664 ıt, 434 qańǵybas mysyq aýlanyp, atyldy.
