SQO-da bıyl mektep bitiretin túlekterdiń 71 paıyzy UBT tapsyryp jatyr

PETROPAVL. QazAqparat – Soltústik Qazaqstan oblysynda bıyl mektep bitiretin 3 345 túlek bolsa, sonyń 71% ulttyq biryńǵaı testileýden ótýge nıet bildirdi, dep habarlaıdy QazAqparat tilshisi.

SQO bilim basqarmasynyń málimetinshe, ulttyq biryńǵaı testileý aqpannyń 11-ne deıin elektrondy formatta óńirdegi «U-Study» ortalyǵynyń 2 fılıalynda ótedi.

Onyń biri - Petropavlda, ekinshisi – Ǵ.Músirepov atyndaǵy aýdannyń Novoıshımskoe aýylynda ornalasqan.

Testileýden mektep bitirýshiler ǵana emes, sondaı-aq joǵary oqý ornyna shartty túrde qabyldanǵandar, basqa mamandyqqa aýysqysy keletin stýdentter de óte alady.

«Ýnıversıtetke shartty túrde qabyldanǵandarǵa tórt múmkindik beriledi. Pedagogıkalyq jáne medıtsınalyq mamandyqtarǵa shekti ball – 75, tehnıkalyq mamandyqtarǵa - 50 ball. Osy tórt múmkindikti paıdalana almasa olar ári qaraı oqýyn jalǵastyra almaıdy. Oqýy beske bolsa da, UBT nátıjesi bolmasa olar kelesi kýrsqa kóshe almaıdy. Bizde ýnıversıtette osyndaı 25 adam bar, jalpy ár mamandyqtan eki-úsh adamnan», - deıdi jergilikti ýnıversıtettiń qabyldaý departamentiniń dırektory Gúlmıra Ospanova.

Qańtar aıyndaǵy testileý qorytyndysy boıynsha shekti deńgeıden ótken mektep túlekteri elimizdiń joǵary oqý oryndaryna kommertsııalyq negizde túsýge quqyq beretin sertıfıkat alady.

Al bilim grantyn taǵaıyndaý konkýrsyna qatysý úshin mindetti túrde jazǵy testileýden ótip, joǵary ball jınaý qajet.

Jalpy bıyl SQO-da mekteptiń 3345 túlegi bar, onyń 2 myńnan astamy nemese 71% UBT-ny qańtar aıynda tapsyrýǵa nıet bildirgen.