SQO-da bıyl mas júrgizýshilerdiń kinásinen 5 adam qaza tapty
PETROPAVL. QazAqparat – Soltústik Qazaqstan oblysynda jyl basynan beri myńǵa jýyq mas júrgizýshisi ustalyp, kólik júrgizý quqyǵynan aıyryldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, óńirde jyl basynan beri mas júrgizýshilerdiń kinásinen 16 jol-kólik oqıǵasy tirkelip, saldarynan 5 adam qaza tapty, 16-sy jaraqattandy.
«Mas kúıde kólik basqarý jaǵdaılaryna jol bermeý – jol qaýipsizdigin nyǵaıtýdaǵy mańyzdy mindetterdiń biri. Mundaı faktiler júrgizýshiler tártibin arttyrýǵa baǵyttalǵan reıdtik jáne jedel-profılaktıkalyq is-sharalar barysynda anyqtalady.
Esterińizge salamyz: mas kúıde kólik tizgindegeni úshin 15 táýlikke ákimshilik qamaýǵa alý jáne 7 jylǵa kólik basqarý quqyǵynan aıyrý jazasy qarastyrylǵan. Mas kúıde kólik júrgizý – barlyq jol qozǵalysyna qatysýshylardyń densaýlyqtary men ómirleri úshin asa qaýipti. Atalǵan faktilerge jol bermeýge baǵyttalǵan jumystar udaıy júrgizilýde», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Máselen, oblysta ótken bir aptalyq «Mas júrgizýshi» jedel-profılaktıkalyq is-sharasy barysynda ishimdik iship rýlge otyrǵan 38 adam ustaldy.
Al jyl basynan beri oblysta jol qaýipsizdigi boıynsha 9 jedel-profılaktıkalyq is-shara uıymdastyryldy, nátıjesinde 981 mas júrgizýshi jaýapkershilikke tartyldy.
