SQO-da bıyl kókjótelmen aýyrǵandar tirkelgen joq
PETROPAVL. QazAqparat – Soltústik Qazaqstan oblysy aýmaǵynda bıyl jiti juqpaly aýrý – kókjótelge shaldyqqandar joq. Negizinen balalar arasynda taraıtyn dert der kezinde emdelmese, bakterıaldy ókpe qabynýyna ákelýi múmkin, dep habarlaıdy QazAqparat tilshisi.
SQO sanıtar dárigerleriniń aıtýynsha, kókjótel – qaýipti ınfektsııalyq aýrýlardyń biri. Onyń qozdyrǵyshy Bordetella pertussis bakterııasy. Kókjótelmen negizinen balalar aýyryp, ol 4-8 apta boıyna sozylýy múmkin.
«Kókjótel naýqas jótelip, túshkirgen kezde aýa-tamshy jolymen ońaı taralady. Kóbine 5 jasqa deıingi vaktsına almaǵan balalar juqtyrady, ásirese bir jasqa deıingi balalar úshin kókjótel qaýipti. Bul aýrýdyń ınkýbatsııalyq kezeńi 5 kúnnen 10 kúnge deıin. Aldymen balada ádettegi sýyq tııý belgileri paıda bolady: murnynan sý aǵyp, dene qyzýy kóteriledi, kózi jasaýrap, jótel paıda bolady. Birtindep kúsheıip, úzdiksiz jótel ustamasyna ulasady. Árbir jótel ustamasynyń sońynda naýqas otteginiń jetispeýine baılanysty kógerýi múmkin. Sondaı-aq álsirep, qusady. Ustama túnde jıileıdi. Ádette koklıýsh dertinde dene qyzýy kóterilmeıdi», - deıdi SQO sanıtarııalyq-epıdemıologııalyq baqylaý departamenti bóliminiń bas mamany Saltanat Bekqojına.
Kókjóteldi der kezinde emdemese asqynyp, bakterııalyq pnevmonııaǵa ulasýy múmkin. Dene qurysyp, bala talyp qalady. Oǵan jótel ustamasy kezinde bas mıyna otteginiń jetpeýi jáne bakterııalyq toksınderdiń áseri sebep. Sondaı-aq tábet joǵalyp, qulaq aýyrýy, aǵzanyń sýsyzdanýy paıda bolýy múmkin.
«Aýrýdy antıbıotıkter arqyly jeńildetýge bolady, kóbine erıtromıtsın qoldanylady. Al koklıýshtyń paıda bolýyna vaktsınatsııadan bas tartý sebep. Sońǵy kezde dinı nanym-senimderi boıynsha ekpe saldyrýdan bas tartýshylar qatary kóbeıgen. Jalpy kókjótel basqarylatyn ınfektsııalarǵa jatady, sebebi bul aýrý profılaktıkalyq egýler durys júrgizilmegende kóbeıedi. Byltyr SQO-da 15 bala kókjótelmen aýyrsa, bıyl dertti juqtyrý jaǵdaıy tirkelmedi», - deıdi Saltanat Bekqojına.
Vaktsına kókjótel, dıfterııa, sirespe, V vırýstyq gepatıti, polıomıelıt jáne b tıpti gemofıldi ınfektsııaǵa qarsy balaǵa 2, 3, 4, 18 aıda jáne 6 jasynda egiledi.
