SQO-da bıyl kókónis saqtaýǵa arnalǵan 4 zamanaýı qoıma salynady
PETROPAVL. QazAqparat – Soltústik Qazaqstan oblysynda jańa ónimge deıin kókónisti saqtaý máselesin sheshý úshin sharýashylyqtar óz qarajatyna 4 zamanaýı qoıma salýdy josparlap otyr. Óńirdegi kókónis qoımalarynyń jalpy syıymdylyǵy taǵy 10,5 myń tonnaǵa artpaq, dep habarlaıdy QazAqparat tilshisi.
Óńirlik kommýnıkatsııalar qyzmetinde SQO aýyl sharýashylyǵy jáne jer qatynastary basqarmasynyń basshysy Meıram Meńdibaev aldaǵy josparlarymen bólisti.
Bıyl óńir dıqandary 4,5 mln ga daqyl ekpek, bul – byltyrǵydan 1 myń ga artyq.
«Osy jyly oblys ákiminiń tapsyrmasyna oraı, óńirdegi azyq-túlik qaýipsizdigin qamtamasyz etý úshin qaraqumyq alqaptaryn 3 ese arttyryp, 27 myń ga jetkizýdi josparladyq. Nátıjesinde oblysty tolyq óz ónimimizben qamtımyz. Kartop pen kókónis alqaptaryn da ulǵaıtyp jatyrmyz. Sol sebepti, oblystyń 4 sharýashylyǵy jalpy aýmaǵy 10,5 myń tonna bolatyn zamanaýı kókónis qoımasyn salýdy josparlady», - deıdi Meıram Meńdibaev.
Basqarma basshysynyń aıtýynsha, qazirgi ýaqytta SQO-da 59,2 myń tonna kókónis syıatyn 59 qoıma bar. Onyń 21-i salqyndatý júıesimen qamtylǵan. Bul kókónisti maýsym aıyna deıin shiritpeı saqtaýǵa múmkindik beredi.
Jalpy, keıingi eki jylda óńirde eki jańa kókónis qoımasy salyndy. Ol jerlerde 7,5 myń tonna ónimdi saqtaýǵa bolady.
