SQO-da bıyl keı jerlerde qar qalyńdyǵy normadan 3 ese kóp
PETROPAVL. QazAqparat – Soltústik Qazaqstan oblysynda bıyl qardyń ortasha qalyńdyǵy 39 sm-ge jetken. Keı jerlerde 60 sm asyp ketken. Bul ótken jylmen salystyrǵanda anaǵurlym kóp, dep habarlaıdy QazAqparat tilshisi.
«Qazgıdromet» RMM SQO fılıalynyń málimetinshe, 2020 jyldyń 20 qarashasy men 2021 jyldyń 20 naýryzy aralyǵynda óńirde qar 50 mm men 169 mm aralyǵynda jaýǵan. Qalypty jaǵdaıda 51-97 mm aspaýy kerek. ıAǵnı normadan 67 %-313 % aýytqyǵan.
Qazir SQO-da qardyń ortasha qalyńdyǵy – 39 sm. Qyzyljar aýdany Nalobıno eldi mekeninde 60 sm deıin jetse, Aqjar aýdany Talshyq aýylynyń mańynda qardyń bıiktigi 15 sm aspaıdy. Byltyr mamandar bul ýaqytta qardyń kúrt erýine baılanysty onyń qalyńdyǵyn ólsheýdi toqtatqan edi. Al bıyl ol 100 % barlyq baqylaý pýnktterinde júrgizilip jatyr.
«Kóktemde kún jylynysymen qar erip, ol sýmen qanyǵady. Bıyl qys byltyrǵymen salystyrǵanda sýyq boldy. Osyǵan baılanysty 20 naýryz kúni tek Talshyqtaǵy meteostansada ǵana qardyń sýmen qanyqqanyn baıqadyq. Byltyr mundaı jaǵdaı 8 pýnktte baıqalǵan edi»,- deıdi fılıal qyzmetkerleri.
Eń kóp qar Ǵ.Músirepov atyndaǵy aýdanda jaýǵan, Novoıshımde 169 mm tirkeldi. Bul 2020 jylmen salystyrǵanda 74 % kem, byltyr Vozvyshenka gıdrobeketinde 228 mm tirkelgen eken.
Al qar eń az jaýǵan eldi meken M.Jumabaev aýdanynda, Báıterek gıdrobeketinde 50 mm tirkelgen. Alaıda bul ótken jylǵydan 12 mm kóp. Byltyr Esil aýdany ıAsnovka gıdrobeketinde nebary 38 mm jaýyn-shashyn jaýǵan.
Qardyń qalyńdyǵyn ólsheý, jaýyn-shashyn mólsherin bilý – sharýashylyqtarǵa agrometeorologııalyq boljam jasaýǵa jáne kóktemgi sý tasqynynyń boljamyna negiz bolady.
