SQO-da bıyl kartop baǵasy arzan
PETROPAVL. QazAqparat - SQO-da bıyl kartop baǵasy arzan. Jylda osy ýaqytta kókónistiń kelisi 200 teńgege deıin jetse, bıyl kóterme saýda bazarlarynda nebary 35-40 teńgeden saýdalanyp jatyr, dep habarlaıdy QazAqparat tilshisi.
SQO statıstıka departamentiniń málimetinshe, byltyr oblysta kókónis alqaby 26,1 %-ke, ıaǵnı 41,8 myń ga ulǵaıdy. Onyń ishinde kartop alqaby 30%-ke artyp, 35,5 myń ga kóbeıdi. Nátıjesinde óńirde 600 myńǵa jýyq tonna kartop alyndy. Bul - 2017 jylmen salystyrǵanda shamamen 100 myń tonnaǵa artyq.
Mol ónim qazir jergilikti bazarlarda arzanǵa satylyp jatyr. Satýshy Gaýhar Shatanovanyń aıtýynsha, olar kásipkerlerden kelisin 30 teńgeden satyp alyp, ústinen 5-10 teńge qosyp saýdalaıdy. Ónim arzan bolǵandyqtan satyp alýshylar da kóp. Kúnine 20 qapqa deıin satatyn kezderi bolady eken.
«Kúzde turaqtandyrý qoryna 500 tonna kartop satyp alynyp, salyndy. Saýda oryndarynda baǵa kúrt qymbattap, kelisi 70 teńgege jetip jatsa nemese kókónis azaıyp ketse biz turaqtandyrý qorynan satýdy bastaımyz», - deıdi SQO Kásipkerlik basqarmasynyń bólim basshysy Murat Nurqanov.
Kartoptyń kóptigi bıyl kókónistiń osy túrin satyp, shash etek paıda tabatyn kásipkerlerge qıyn bolyp tur. Artylǵanyn Pákistan men Ózbekstanǵa satatyn sharýalardyń ónimderine suranys az. Bıyl kórshi memleketterde de kókónis jaqsy shyǵypty.
