SQO-da bıyl qaraqumyq alqabyn 2,4 ese arttyrmaq
PETROPAVL. QazAqparat – Soltústik Qazaqstan oblysynda bıyl 4,3 mln ga aýmaqqa dándi daqyldar egilmek, onyń 22 %-y maıly daqyldar, dep habarlaıdy QazAqparat tilshisi.
SQO aýyl sharýashylyǵy jáne jer qatynastary basqarmasynyń málimetinshe, bıdaı – 2,9 mln ga, maıly daqyldar - 950 myń ga, jemshóp –329,4 myń ga, kartop – 32,1 myń ga, kókónis – 6,1 myń ga egiledi.
«Bıyl qaraqumyqtyń alqaby 2,4 ese artyp, 10 myń ga jetpek. Byltyr áleýmettik mańyzy bar daqyl oblys boıynsha 4,2 myń ga egildi. Jalpy oblys tuqymmen tolyq qamtylǵan, jetkilikti qor – 479 myń tonna bar.
Surypty 8,9 %-ǵa nemese 43,9 myń tonnaǵa jańalaý josparlanǵan. Byltyr elıtalyq tuqymnyń úlesi - 8,7 % boldy», - deıdi SQO aýyl sharýashylyǵy jáne jer qatynastary basqarmasy basshysynyń orynbasary Qýandyq Shakýbaev.
Óńir dıqandary qazir kóktemgi egiske ázirlenip, qural-saımandaryn daıyndap jatyr. Jyl basynan oblys dıqandary 8,3 mlrd teńgege 523 tehnıka men jabdyq satyp aldy. Bul ótken jyldyń uqsas kezeńimen salystyrǵanda eki ese artyq. Bıyl ylǵal qory da jaqsy. Qar jamylǵysy 12-54 sm aralyǵynda boldy. Sondaı-aq keı sharýashylyqtar 3 mln ga qar toqtatý jumystaryn júrgizdi.
«2,5 mln ga alqapqa 160 myń tonna mıneraldy tyńaıtqysh sebý josparlanǵan. Bul ótken jylǵydan 18,5 %-ǵa artyq. Ázirge 66,3 myń tonnaǵa sharttar jasaldy. Onyń 61 myń tonnasyna tólem jasaldy. Al fıtosanıtarııalyq jaǵdaıdy turaqtandyrý maqsatynda 3,4 mln ga alqapqa aramshópke qarsy is-sharalar júrgiziledi», - deıdi Qýandyq Shakýbaev.
SQO-ǵa kóktemgi egis jumystaryn júrgizýge 68,2 myń tonna dızel otyny qajet. Aýyl sharýashylyǵy taýaryn óndirýshilerge onyń lıtri – 172 teńgeden saýdalanbaq. Janar-jaǵar maı jetkizý operatorlary bekitildi.
2021 jyly óńirdiń agrarlyq sektoryn damytýǵa 45,2 mlrd teńge sýbsıdııa qarastyrylǵan. Onyń 17,1 mlrd teńgesi ósimdik sharýashylyǵyna baǵyttalmaq.
