SQO-da bıyl gaz qurylǵylaryn durys paıdalanbaýdan 9 órt shyqqan
PETROPAVL. QazAqparat – Soltústik Qazaqstan oblysynda órt sóndirýshiler kásipkerlermen kezdesip, tótenshe jaǵdaılar men órttiń aldyn alý máselerin kóterdi, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, mamandarmen onlaın kezdesýge óńirdiń bıznes nysandarynyń ókilderi qatysty.
«Jyl saıyn oblysta 700-800-ge deıin órt bolady, onda 50-ge deıin adam qaza tabady. Órtter, árıne, negizinen turǵyn úı sektorynda shyǵady, alaıda jeke kásipkerlik nysandarynda bolǵan órtterden keltirilgen zalal turǵyn úıdegi órtterden keltirilgen zalalǵa qaraǵanda áldeqaıda joǵary. Mysaly, 2020 jyly 733 órt boldy, bul 2019 jylmen salystyrǵanda 3%-ǵa kóp. Onyń ishinde 51-i jeke kásipkerlik nysandarynda bolǵan. Bıyl jyl basynan beri oblys aýmaǵynda 651 órt tirkeldi, onyń ishinde saýda jáne óndiristik maqsattaǵy nysandarda 49 órt shyqty», - deıdi SQO TJD bastyǵynyń orynbasary Oral Ábdirahmanov.
Sondaı-aq, gaz qurylǵylaryn paıdalaný kezinde qaýipsizdik erejelerin buzý saldarynan da órt jıi týyndaıdy eken.
«Jyldyń basynan beri osyndaı 9 órt tirkeldi, onyń ishinde 20 adam jaraqattanyp, 4 adam qaza tapqan bir jarylys boldy. Oqys oqıǵalarǵa gaz qurylǵylaryn paıdalaný kezinde qaýipsizdik erejelerin eskermeý sebep bolǵan. Oblys ortalyǵynda kóp qabatty úılerde jáne olardyń janynda gaz ballondaryn paıdalanatyn dámhanalar jumys isteıdi. Sondaı-aq benzın, dızel otyny, suıytylǵan kómirsýtekti gazdy satatyn avto jáne gaz quıý stantsııalarynyń sany ósip keledi. Al órtter birinshi kezekte, tutynýshylardyń gaz jáne gazben jabdyqtaý, ónerkásiptik jáne órt qaýipsizdigi salasyndaǵy talaptardy elemeýi saldarynan bolady», - deıdi SQO TJD bólimshe bastyǵy Sáken Aǵzamov.
