SQO-da bıyl esirtki qylmysy úshin 25 jasqa deıingi 13 adam sottaldy
SQO polıtsııa departamenti baspasóz qyzmetiniń málimetinshe, tártip saqshylary jastar arasynda esirtki qylmysynyń aldyn alý maqsatynda Petropavldyń stýdenttik jataqhanalarynda reıdtik is-shara ótkizdi.
«Jazǵy demalys bastalysymen kóptegen stýdentter men oqýshylar qosymsha jumys izdeı bastaıdy. Bul esirtki satýmen aınalysatyn qylmyskerlerge jaqsy tanys. «Taýardy jetkizýshini» jumysqa alý týraly habarlandyrýlardy kóbinese habarlandyrý saıttarynda jáne áleýmettik jelilerde baıqaýǵa bolady. Keıbir jastardyń «jeńil aqshaǵa» degen umtylysy jáne qylmystyq jaýapkershilikti bilmeýi olardyń bolashaǵyna balta shabýy múmkin. Óıtkeni búginde esirtki zattaryn taratýshylarǵa qatań jaza qarastyrylǵan», - deıdi polıtseıler.
Jastar osyndaı qatelikterge urynbaýy úshin esirtki qylmysyna qarsy is-qımyl basqarmasynyń qyzmetkerleri men ıývenaldyq polıtseıler, jastar resýrstyq ortalyǵynyń eriktilerimen birge stýdentterge paraqshalar taratty. Jastarǵa QR Qylmystyq kodeksiniń 297-babynyń sanktsııasymen kózdelgen jaýapkershilik túsindirildi. Oǵan sáıkes 10 jyldan 20 jylǵa deıin bas bostandyǵynan aıyrý jazasy qarastyrylǵan.
«Jyl basynan SQO-da esirtki ótkizgeni úshin 25 jasqa deıingi 13 adam sottaldy. Ádette mundaı adamdardy sot 10-12 jylǵa bas bostandyǵynan aıyrady, biraq bizdiń óńirde 14 jylǵa sottalǵandar da bar. Jastardan esirtki qylmysymen aınalysatyndarǵa aldanyp qalmaýyn eskertemiz. Internet keńistiginde «taýar jetkizýshilerdi» jumysqa alý týraly kúmándi habarlandyrýlardy kórseńiz, dereý polıtsııaǵa habarlaǵan jón. Biz olardy buǵattap, tıisti sharalar qabyldaımyz», - deıdi SQO PD esirtki qylmysyna qarsy is-qımyl basqarmasynyń bastyǵy Ivan Terzıdı.
Jyl basynan SQO-da esirtki ótkizdi degen kúdikpen 49 adam ustaldy.
