SQO-da bıyl avtojoldardy jóndeýge 32 mlrd teńge jumsaldy
PETROPAVL. QazAqparat – Soltústik Qazaqstan oblysynda bıyl avtomobıl joldaryn qalypqa keltirýge 32 mlrd teńge jumsaldy. Osylaısha sońǵy 5 jyldyń ishinde salany qarjylandyrý shamamen 2 ese artty, dep habarlaıdy QazAqparat tilshisi.
SQO ákiminiń orynbasary Sátjan Ablalıevtiń aıtýynsha, avtomobıl joldaryn jóndeýge, salýǵa ınvestıtsııa kólemi aıtarlyqtaı artqan. Eger 2017 jyly bul maqsatqa 18,7 mlrd teńge bólinip, 22 avtojol kompanııasy tartylsa, bıyl 32 mlrd teńge jumsalyp, 44 jol kompanııasy ýchaskelerde eńbek etti. Nátıjesinde 626 km jol jóndeldi.
«Máselen, respýblıkalyq mańyzdaǵy joldyń Voloshınka - Tımırıazevo eldi mekenderi arasyndaǵy 35 km, Kókshetaý - Kellerovka jolynyń 26 km, Saýmalkól - Kamennyı Brod tasjolynyń 40 km jónge keltirildi.
Jergilikti mańyzdaǵy joldarǵa keletin bolsaq, Taıynsha - Chkalovo baǵytynyń sońǵy ýchaskesi - 8 km qalpyna keltirildi. Jalpy 80 km jóndeldi.
Benıash - Nadejka aýyldarynyń arasynda 9 km, Grıgorevka - Kamyshlovo arasynda 5 km, Saýmalkól - Kazanka arasynda 6 km jol kúrdeli jóndeldi.
Lobanovo – Aryqbalyq – Chıstopole eldi mekenderiniń arasyndaǵy 33 km, Letovochnoe – Kelerovka 20 km, Býlaevo - Kýlomzıno 33 km, Voskresenovka - Ledeneva 23 km orta jóndeýden ótti.
Bul jumystar jol ýaqytyn qysqartyp, avtojoldy qoldanýshylardyń amortızatsııaǵa ketetin shyǵynyn azaıtty», - dedi Sátjan Ablalıev.
Kelesi jylǵa bıyldan jalpy uzyndyǵy 350 km bolatyn 25 joba qaldy, sondaı-aq jańadan jalpy uzyndyǵy 500 km bolatyn 53 joba qolǵa alynady.
SQO ákimi orynbasarynyń aıtýynsha, eldi meken kósheleri de nazardan tys qalmady. Bıyl 52 aýylda 148 km joldy jóndeý jumystary qolǵa alynsa, sonyń 106 km iske qosyldy. Imantaý, Antonovka, Saýmalkól, Talshyq, Dáýit, Kıevskoe, Býlaevo, Vozvyshenka, Chervonoe, Birlik, Býdennoe, Toqsan bı, Razgýlnoe, Lomanosovka, Shóptikól eldi mekenderiniń turǵyndary oń ózgeristi sezindi.
Keler jyly aýyl kóshelerin jóndeýge qatysty jumystar jalǵasady, buryn bastalǵan 25 jáne jańadan 31 jobany aıaqtaý mindeti tur.
