SQO-da bıyl abattandyrý erejelerin buzýdyń 3 myńǵa jýyq deregi tirkeldi
PETROPAVL. QazAqparat – Soltústik Qazaqstan oblysynda jyl basynan abattandyrý erejelerin buzýǵa qatysty 3 myńǵa jýyq derek tirkelse, sonyń 1 myńy Petropavlǵa tıesili, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, bıyl tártip saqshylary abattandyrý erejelerin buzǵandarǵa 2882 hattama toltyrǵan, onyń 1 myńnan astamy Petropavl qalasyna qatysty. Osy ýaqytqa deıin aýmaqtan qar shyǵarý problemasy ózekti boldy. Endi qar erisimen úı mańyn qoqystan tazalaý máselesiniń ózektiligi artty.
Petropavldaǵy Satpaev kóshesindegi kóp qabatty úıdiń qasynda qysta qoqys paıda bolǵan. Qardan kórinbeı jatqan qoqys kún jylynysymen jurttyń nazaryna ilikti. Turǵynnyń biri ony túsirip alyp, «Instagram» áleýmettik jelisine salǵan.
Osyǵan baılanysty №3 ýchaskelik polıtsııa pýnktiniń ýchaskelik polıtsııa ınspektory PIK tóraǵasymen profılaktıkalyq áńgime júrgizdi. Ol qoqysty jınaýǵa mindetteldi.
«Abattandyrý erejelerin saqtaýǵa qatysty turaqty reıdterdi jalpyqalalyq senbilikten keıin ótkizý josparlanyp otyr. Desek te, turǵyndardy erejeni buzǵandarǵa aıyppul barlyǵyn eskertemiz. Jeke jáne zańdy tulǵalar aýmaqty taza ustaýǵa mindetti. Tekseristerdiń maqsaty aıyppul salý emes, bul shara qaıtalap buzatyndarǵa qoldanylady. Jergilikti polıtsııa qyzmetiniń atalǵan jumys jelisi halyqtyń sanıtarııalyq jaǵdaıyn qamtamasyz etýge jáne eldi mekenderdiń tıisti estetıkalyq qalpyn saqtaýǵa baǵyttalǵan», - deıdi SQO polıtsııa departamenti jergilikti polıtsııa qyzmeti basqarmasy bastyǵynyń orynbasary Aleksandr Rozbah.
