SQO-da bıyl 9 myńǵa jýyq búldirshin mektep tabaldyryǵyn alǵash ret attaıdy
PETROPAVL. QazAqparat – Soltústik Qazaqstan oblysynda bıyl 9 myńǵa jýyq bala 1-synypqa barady. Oqýshy sanynyń kóbeıýine baılanysty jańa oqý jylynda eki jańa mektep paıdalanýǵa berilmek, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, 2018 jyly 1-synypqa 7,7 myń, 2019 jyly 8,5 myń bala barsa, bıyl 9 myńǵa jýyq búldirshin mektep tabaldyryǵyn alǵash attamaq.
Bala sanynyń ósýine baılanysty oblystyń keı mektepterinde sabaq úsh aýysymmen júrgizildi. Máseleni sheshý úshin óńirde jańa mektepter salynyp jatyr. Máselen byltyr «Bereke» yqsham aýdanynda jańa mektep ashyldy. Bıyl jańa oqý jyly jáne Konstıtýtsııa kúni qarsańynda «Jas Órken» yqsham aýdanynda 900 oryndyq mektep paıdalanýǵa beriledi. Óńir basshysy Qumar Aqsaqalov jańa mekteptiń daıyndyǵyn baryp kórdi.
«Jańa ǵımaratqa Petropavldaǵy Qojabergen jyraý atyndaǵy №6 mektep aýysady. Osylaısha ata-analar men muǵalimderdiń jaıly mektep salý jónindegi ótinishteri qanaǵattandyryldy. Eski mektep 200 balaǵa shaqtalǵanymen, onda byltyrlary 600 bala oqyp kelgen. Saldarynan sabaq úsh aýysymda júrdi. Endi balalar keń ári yńǵaıly kabınetterde oqıdy», - deıdi oblys ákimi.
Jańa oqý jylyn Qyzyljar aýdanyndaǵy Beskól aýylynyń bir top balasy da jańa mektepte bastaıdy. Aýylda jańa yqsham aýdannyń paıda bolýyna baılanysty bilim ordasy boı kóterdi.
Qazirgi ýaqytta Petropavldaǵy Ýálıhanov kóshesinde taǵy bir mektep salynyp jatyr. Keler jyly Taıynsha aýdanynda eki bilim ordasynyń qurylysy bastalmaq.
«Mektepterde kúrdeli jóndeý jumystary jalǵasyp jatyr. Byltyr 142 mektep jańarsa, bıyl olardyń qataryna 107-si qosyldy. Osylaısha, eki jyl ishinde biz óńir mektepteriniń jartysyn jańarttyq. Qaýipsizdikti qamtamasyz etý maqsatynda barlyq mektepke beınebaqylaý kameralary ornatyldy. Bilim mekemeleriniń avtoparkine 43 avtobýs alyndy», - deıdi Qumar Aqsaqalov.
Oblysta kadr tapshylyǵy máselesi de tolyq sheshilip, sońǵy úsh jylda óńirge 1,5 myńǵa jýyq jas muǵalim keldi.
Buǵan deıin Petropavl qalasy muǵalimderiniń baspana máselesin sheshý maqsatynda turǵyn úı sertıfıkattarynyń beriletindigin aıtqan edik.
Sondaı-aq búgin SQO ákimi «Jas maman» jobasyna qatysyp jatqan kolledjderdi aralap shyqty.
