SQO-da bıyl 7 mektep jabylmaq

PETROPAVL. QazAqparat – Soltústik Qazaqstan oblysynda bala sanynyń jetispeýshiligine baılanysty bıyl jeti bastaýysh mektepti jabý josparlanǵan, dep habarlaıdy QazAqparat tilshisi.

SQO bilim basqarmasynyń málimetinshe, qazirgi ýaqytta oblysta 465 mektep jumys isteıdi, onyń 352-si shaǵyn jınaqty. Bıyl oqýshy sany beseýge jetpeıtin 7 bastaýysh mektepti jabý josparlanǵan.

Sońǵy 3 jylda óńirde jeliniń kepildendirilgen memlekettik normatıvine sáıkes kelmeıtin 19 mektep jabyldy.

Oqýshy jetispeýshiligi máselesin sheshý úshin qandas otbasylarynyń balalary jáne jumys kúshi artyq óńirlerden qonys aýdarýshylar esebinen aýyl mektepteriniń kontıngentin ulǵaıtý boıynsha jumys qolǵa alynǵan. Nátıjesinde bıylǵy jańa oqý jylynda oblystyń bilim berý uıymdarynda qonys aýdarýshylar otbasylarynan 820 bala jáne qandastar otbasylarynan 106 bala oqymaq.

Qazir SQO-daǵy 170 aýylda mektep joq. Olarda 1480 oqýshy turady. 127 aýylda tek bastaýysh nemese negizgi mektepter jumys isteıdi. Osy aýyldarda turatyn balalar jaqyn mańdaǵy 143 mektepke arnaıy kólikpen jetkiziledi.

Apta saıyn 1003 oqýshy mektep janyndaǵy 50 ınternatqa tasymaldanady. Kún saıyn mektepterge 1618 oqýshy jetkiziledi.

Oqýshylardy tasymaldaýǵa 143 avtokólik bólingen.