SQO-da bıyl 7 mektep jabyldy
PETROPAVL. QazAqparat – Soltústik Qazaqstan oblysynda bıyl mektepterdiń sany jeteýge qysqaryp, taǵy sonshasy oqýshylardyń sanyna qaraı orta mektepten negizgige, negizgiden bastaýyshqa aýysty, dep habarlaıdy QazAqparat tilshisi.
Ótken oqý jylynda óńir boıynsha 485 mektep bolsa, bıyl qyrkúıektiń 1-i 479 bilim ordasy balalardy qabyldaıdy. Onyń 78 paıyzy shaǵyn komplektili bilim berý mekemeleri. Talapqa saı kelmeıtin Aıyrtaý, Esil, Jambyl, Qyzyljar jáne Taıynsha aýdandarynyń 7 mektebi jabyldy. Buǵan bala sanynyń azdyǵy sebep bolǵan, memlekettik normatıv boıynsha oqýshy 5-eýden kem bolmaýy tıis.
«Eldi mekendegi bilim berý ordasynda oqýshy sany 5 nemese odan da kóp bolýy qajet. Negizgi mektepte 1-9 synypqa deıingi oqýshy sany 41 den asý kerek, orta mektepte 1 men 11 synyp aralyǵynda 81 bilim alýshydan kem bolmaýy kerek. Mektepti jabý týraly sheshim shyǵarylarda «Bilim» týraly zań negizge alynady. Birneshe jyl mekteptiń damýy, kadr sany baqylaýǵa alynady. Jabý týraly sońǵy sheshimdi aýdan ákimdigi qabyldaıdy», - deıdi oblystyq Bilim berý basqarmasynyń bas mamany Natalıa Serbına.
Sondaı-aq Aıyrtaý, Aqjar jáne Taıynsha aýdandarynda 3 bilim berý mekemesi orta mektepten negizgige, 4-eýi negizgiden bastaýyshqa aýysty. Qaıta qurylǵan jáne jabylǵan mektepterdiń oqýshylary jaqyn mańdaǵy bilim ordalaryna arnaıy kólikpen jetkiziledi.
Bıyl Petropavl qalasyndaǵy Bereke yqsham aýdanynda 600 orynǵa shaqtalǵan jańa mektep qoldanysqa beriledi. Al oblys boıynsha birinshi synypqa 9 myńǵa jýyq búldirshin barmaqshy.
