SQO-da bıyl 655 mas júrgizýshi jaýapqa tartyldy
PETROPAVL. QazAqparat – Soltústik Qazaqstan oblysynda spırttik ishimdik iship, kólikke otyrǵan 655 kólik júrgizýshisi ákimshilik jaýapkershilikke tartyldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Chelıabi-Novosibir tas jolyna kezekshilik etip júrgen patrýldik polıtsııa batalonynyń qyzmetkerleri Penkovo men Asanovo eldimekenderiniń arasynda jolaýshysy bar «Vortex» mototsıklin baıqaıdy. Júrgizýshi kólik quralyn senimsiz basqarǵan. Polıtseıler mototsıkldi toqtatady. Rýlde Petropavl qalasynyń 1975 jyly týǵan turǵyny bolǵan. Ol jolǵa shyǵarda spırttik ishimdik ishkenin moıyndady. Osyndaı jaǵdaıda ol jolaýshy, óziniń ógeı ákesin oblys ortalyǵynan 60 shaqyrymdaı jerdegi Maǵjan Jumabaev aýdanyndaǵy aýyldardyń birine jetkizbek bolǵan.
Polıtseıler jolshybaı kólik toqtatyp, jolaýshyny barar jerine deıin jetkizýdi ótinedi. Al júrgizýshini medıtsınalyq kýálandyrýdan ótkizip, onyń mas bolǵandyǵy rastaldy. Sondaı-aq mototsıkl júrgizýshisiniń kólik júrgizý boıynsha oqýdan ótpegeni jáne júrgizýshi kýáligi bolmaǵany anyqtaldy.
Kólik quralyn basqarýǵa quqyǵy joq jáne rýlge mas kúıde otyrǵan júrgizýshige ákimshilik hattama toltyryldy. Sol kúni qashyqtan sot otyrysy ótip, eldimeken turǵynyn otyz táýlikke ákimshilik qamaqqa alýǵa úkim shyǵaryldy.
Jalpy SQO-da jyl basynan ishimdik iship kólik basqarǵan 655 júrgizýshi jaýapkershilikke tartyldy.
