SQO-da bıyl 60 adamdy kene shaqty
PETROPAVL. QazAqparat - SQO-da kún jylynǵaly 60 adamdy kene shaqty, onyń 24-i bala, dep habarlaıdy QazAqparat tilshisi.
Bıyl SQO-da kóktemniń erte shyǵý zııankes jándikterdiń de merziminen buryn oıanýyna ákeldi. Kenelerge shaǵym aıtqan turǵyndar sany óńirde kún sanap artyp barady. Negizinen tabıǵat aıasyna demalýǵa shyqqandar qan sorǵyshtardan zardap shekken.
SQO Qoǵamdyq densaýlyqty saqtaý departamenti mamandardyń aıtýynsha, óńir aýmaǵynyń basym bóligi týlıaremııanyń jáne kene bórtpe súzeginiń tabıǵı oshaǵy aımaǵynda ornalasqan. Bul aýrýlardy týǵyzatyn mıkrobtar kemirgishter men jabaıy janýarlarda bolady. Al adamǵa kene arqyly juǵýy múmkin. Alaıda barlyq keneler ınfektsııa qozdyrǵyshtaryn tasymaldaýshy bolyp tabylmaıdy, olardyń aýrý taratatyn nemese taratpaıtynyn adamdar óz betinshe anyqtaı almaıdy. Ol - arnaıy zerthanada ǵana tekseriledi eken.
Byltyr oblys boıynsha týlıaremııanyń 1, kene entsefalıtiniń 3 jáne kene bórtpe súzegimen aýrýdyń 20 jaǵdaıy tirkeldi. Jalpy, kene arqyly taralatyn negizgi aýrýlar: vırýstyq kene entsefalıti, kene bórtpe súzegi, ıksodtyq kene borrelıozi, gemorragııalyq qyzbalar, kenelik teńbil bezgegi.
«Kene bórtpe súzegimen aýrý kene shaqqannan soń 2-7 kúnnen keıin bastalady, deneniń qaltyraýy, temperatýranyń 38-40 gradýsqa deıin tez artýy, álsizdik, bastyń jáne bulshyq etterdiń aýyrýy baıqalady. Aýrýǵa tán belgiler: teri bórtip, kóbinese keýdege, arqaǵa jáne qoldyń búgiletin jerine shyǵady», - deıdi SQO Qoǵamdyq densaýlyqty saqtaý departamentiniń bas mamany Tolqyn Qajenova.
Al, týlıaremııany juqtyrǵanda naýqasta qaltyraý, dene qyzýynyń 38-40 gradýsqa deıin kóterilýi, denesiniń aýyrsynýy, bas aýrýy, álsizdik týyndaıdy.Týlıaremııada adam aǵzasynyń ártúrli organdary men júıeleri zaqymdanýy múmkin, aýrý jıi aýyr jáne sozylmaly túrde ótedi eken.
Bıyl SQO-da maýsym bastalǵaly 60 adamdy, sonyń ishinde 24 balany kene shaqsa, byltyr osy sebeppen 700-ge jýyq adam dárigerge qaralǵan. Onyń 234-i balalar.
«Byltyr kene shaǵý jaǵdaıy 2017 jylmen salystyrǵanda shamamen 300-ge artyq boldy. Qan sorǵyshtyń shaqqanyn kórgen jaǵdaıda basty qaterge tikpeı, dárigerge kóringen abzal. Keneler 1,5 metrden joǵary kóterilmeıdi. Sol sebepti ormanǵa, alańqaıǵa shyqqanda qorǵaný sharalaryn eskerý qajet, ıaǵnı jabyq kıim kıip, repellentterdi qoldanǵan jón», - deıdi SQO Qoǵamdyq densaýlyqty saqtaý departamentiniń bólim basshysy Farıda Muhamedjanova.
