SQO-da bıyl 5 aýyl kolledji zamanaýı qondyrǵylarmen jaraqtandyrylady

PETROPAVL. QazAqparat – Soltústik Qazaqstan oblysynda bıyl bilim salasynyń qajetine jergilikti bıýdjetten 95,6 mlrd teńge bólindi, bul byltyrǵydan 9 mlrd-qa artyq, dep habarlaıdy QazAqparat tilshisi.

SQO ákimi Qumar Aqsaqalovtyń aıtýynsha, bıyl da bilim berý mekemelerin kúrdeli jóndeýden ótkizý jumystary jalǵasady. Sońǵy eki jylda óńirde 249 mektep jóndeldi, bul – barlyq bilim ordalarynyń 50 %-i. Bul maqsatqa 10 mlrd teńge jumsaldy.

«Mektepter jóndelip jatyr. Atqarylǵan jumystardan keıin balalarǵa bilim alý yńǵaıly boldy. Bıyl da mektepter jóndeledi. Bul maqsatqa qarjy bólindi. Jalpy sońǵy úsh jylda oqýshylar sany 2,5 myńǵa artyp otyr. Sol sebepti jańa jylda Taıynsha aýdanynda 720 oryndyq jańa mekteptiń qurylysyn bastaımyz, al Petropavldaǵy 900 orynǵa shaqtalǵan mektepti paıdalanýǵa beremiz», - dedi oblys ákimi.

Byltyr barlyq mektepter beınebaqylaý qondyrǵylarymen jaraqtandyryldy. 400 mln teńgege mektepterge kólik alyndy. Bıyl 500 mln teńgege 18 kólik, mektep jıhazy, sport qural-jabdyqtary satyp alynbaq.

Jalpy bıyl bilim salasyna jergilikti bıýdjetten 95,6 mlrd teńge bólindi, bul byltyrǵydan 9 mlrd teńgege artyq.

«Oblys kolledjderiniń materıaldyq-tehnıkalyq bazasyn nyǵaıtýdy jalǵastyramyz. Qazir 4 kolledjde bolashaq qurylysshylar, programmıster, qyrnaýshylar, mehanıkter, elektrık pen tehnologtar jańa joǵarytehnologııalyq qondyrǵylarda bilimderin jetildirip jatyr. Kelesi kezekte aýyldyń 5 kolledji tur. Osy maqsatqa 1,4 mlrd teńge jumsaımyz», - dedi oblys ákimi.

Budan basqa kolledj stýdentteriniń jataqhana máselesi de sheshilmek. 574 orny bar úsh jataqhana 2,2 mlrd teńgege kúrdeli jóndeledi.