SQO-da bıyl 42 sport nysany paıdalanýǵa berildi
SQO Ǵ.Músirepov atyndaǵy aýdannyń Raısovka eldi mekeninde jabyq hokkeı korty paıdalanýǵa berildi. Bul bıyldyqqa iske qosylǵan osymen tórtinshi muz aıdyny. Jalpy jyl sońyna deıin 42 sport nysany ashylsa, sonyń ishinde eki dene shynyqtyrý-saýyqtyrý kesheni, 21 shaǵyn fýtbol alańy bar. Qazir aýdandarda taǵy 5 sport kesheniniń qurylysy júrip jatyr.
«Keler jyly taǵy 6 hokkeı korty salynady. Jańa sport nysandary sportshylardy ázirleýge, olardy jaqsy kórsetkishterge qol jetkizýge yntalandyrady. Mysaly, «Barys» basketbol klýby bıyl Joǵary lıga chempıony boldy. «Esil» men «Qýanysh» voleıbol klýbtary Ulttyq lıganyń qola medaldaryn ıelendi. «Qýanysh» sondaı-aq alǵash ret óńir tarıhynda Qazaqstan Kýbogynyń qola júldesin jeńip aldy. «Qyzyl-Jar» fýtbol klýby 20 jylda alǵash ret maýsymdy 4 orynda aıaqtap otyr. Jalpy óńir sportshylary bıyl 300-den astam respýblıkalyq, halyqaralyq jarystarǵa qatysyp, 1,5 myńǵa jýyq medal aldy», - deıdi SQO ákimi Qumar Aqsaqalov.
Sportpen aınalysatyn balalardyń qataryn arttyrý maqsatynda jáne memlekettik sport tapsyry aıasynda óńirde 3 myńnan astam bala sektsııalarǵa tegin barýǵa múmkindik aldy.
«Úsh myń otbasynyń árqaısy aıyna keminde 10-20 myń teńge únemdeı almaq. Al birneshe balasy bolsa, bul soma kóbeıe túspek. Jaqsy kómek dep oılaımyn. Keler jyly Petropavlda 3 myń orynǵa shaqtalǵan sport saraıynyń qurylysyn bastaımyz. Ol halyqaralyq standarttarǵa saı salynady. Osylaısha joǵary deńgeıdegi jarystardy uıymdastyramyz. Budan basqa «Qarasaı» stadıonyn jańǵyrtýdy josparlap otyrmyz», - deıdi óńir basshysy.
