SQO-da bıyl 400-ge jýyq áleýmettik mańyzy bar nysan jónge keltiriledi
PETROPAVL. QazAqparat – Soltústik Qazaqstan oblysynda bıyl áleýmettik mańyzy bar 377 nysan jóndeledi, sonyń ishinde 32 mádenıet úıi jańalanbaqshy, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, ondaǵan jyldan keıin alǵash ret bıyl mádenıet nysandary jónge keltirilip jatyr. Oblys boıynsha 32 mádenıet úıi jóndelmek. Olardyń qatarynda Aqjar aýdanyndaǵy Aqjarqyn jáne Voshodskoe eldimekenderindegi nysandar da bar. Aýyldardaǵy mádenıet úıleriniń ishi-syrty ǵana jańalanyp qoımaı, atqaratyn qyzmetine de ózgeris enbek.
«Aýyldardaǵy burynǵy mádenıet úıleri men qazirgileriniń aıyrmashylyǵy jer men kókteı bolýy tıis. ıAǵnı, kópfýnktsııaly bolyp, ol jerde kórý zalynan basqa sportpen aınalysatyn trenajerler zaly, kıinetin jeri bolǵany durys. Barlyq, tipti sporttyq is-sharalar da osy jerde ótýi kerek», - deıdi oblys ákimi Qumar Aqsaqalov.
Aqjar aýdanynda 719 mln teńgege 21 nysan jóndeledi. Olardyń ishinde mektepter, mádenıet jáne sport nysandary bar. SQO boıynsha bıyl áleýmettik mańyzy bar 377 nysandy: joldardy, sý nysandaryn, mektepterdi, aýrýhanalardy, mádenıet jáne sport keshenderin jónge keltirý josparlanǵan.
Qazir aýdan ortalyǵy Talshyqta stadıon kúrdeli jóndelip jatyr. Munda jasandy gazon tóselip, tartan jabyndysy bar júgirý joly salynady. Dene shynyqtyrý-saýyqtyrý kesheniniń qurylysy bitýge jaqyn. Jalpy bıyl óńirdiń aýdan ortalyqtarynda osyndaı alty dene shynyqtyrý-saýyqtyrý kesheni turǵyzylmaq.
