SQO-da bıyl 39 mlrd teńgege avtomobıl joldary jóndelip jatyr
PETROPAVL. QazAqparat – Soltústik Qazaqstan oblysynda bıyl 39,1 mlrd teńgege 1 myń shaqyrymnan astam avtojol men eldi mekenderdiń kósheleri jónge keltirilmek, dep habarlaıdy QazAqparat tilshisi.
SQO Jolaýshylar kóligi jáne avtomobıl joldary basqarmasy basshysynyń mindetin atqarýshy Maqsat Baıahmet brıfıng ótkizip, óńirde osy sala boıynsha atqarylyp jatqan jumystarǵa esep berdi.
SQO-da 9 myń shaqyrymnan astam avtojol bar. Uzyndyǵy boıynsha Shyǵys Qazaqstan jáne Qostanaı oblystarynan keıin úshinshi orynda. Joldardyń 65 % qazirgi tańda jaqsy jáne qanaǵattanarlyq deńgeıde.
«Byltyr respýblıkalyq jáne jergilikti mańyzy bar avtojoldardy jóndeýge 30 mlrd teńge bólindi. 676 shaqyrym jol qalypqa keltirildi. Joldardyń keı bóligi kúrdeli jóndelse, endi birine ortasha jáne aǵymdaǵy jumystar júrgizildi. Bıyl osy maqsatqa 39,1 mlrd teńge bólinip otyr. Oǵan 1 myń shaqyrymnan astam avtojol men eldi mekenderdiń kósheleri jóndelmek. Sonyń ishinde «Aýyl - el besigi» jáne «Jumyspen qamtý 2020 jol kartasy» baǵdarlamalary boıynsha 8,5 mlrd teńgege 355 shaqyrym aýylishilik joldar jónge keltirilmek», - deıdi Maqsat Baıahmet.
Aýqymdy jumystar M.Jumabaev, Ǵabıt Músirepov jáne Qyzyljar men Tımırıazev aýdandaryn qamtymaq.
«Jumystar sapaly atqarylyp, nysandar merziminde tapsyrylýy úshin avtorlyq jáne tehnıkalyq qadaǵalaýmen qatar6 múddeli uıymdar zań aıasynda atqarylǵan jumystardy únemi baqylap otyrady. Jóndeý jumystary júrgizilip jatqan orynǵa shyǵyp, tekserýler uıymdastyrylady. Ol jumystar aktilermen bekitilgen. Basqarma «Jol aktıvteri ulttyq sapa ortalyǵy» RMK joldy kútip ustaý jáne jóndeý sapasyn qadaǵalaýdy júıelendirý maqsatynda kelisim jasady», - deıdi basqarma basshysynyń mindetin atqarýshy.
SQO-da avtomobıl joldaryn jónge keltirý jumystary 30 qazanǵa deıin aıaqtalýy qajet. Búginge deıin 53 paıyzy atqaryldy.
