SQO-da bıyl 39 mektepti jóndeýge 3,8 mlrd teńge bólinedi
SQO bilim basqarmasynyń basshysy Názir Jáshibekov ótken jyly atqarylǵan jumystardy qorytyndylap, osy jyldyń josparlarymen bólisti.
Vedomstvo jetekshisiniń aıtýynsha, sońǵy úsh jylda bilim berý salasynyń bıýdjeti 1,5 ese ósip, 134,8 mlrd teńgege jetken.
«Bilim salasyndaǵy barlyq jumys bilim sapasyn arttyrýǵa, qala jáne aýyl mektepteri arasyndaǵy alshaqtyqty qysqartýǵa baǵyttalǵan. Taıynsha aýdanynda 720 orynǵa arnalǵan 2 mektep qurylysy júrip jatyr. Onyń biri - Vıshnevka eldi mekeninde, 120 orynǵa shaqtalǵan, ekinshisi Taıynsha qalasynda salynyp jatyr, 600 orynǵa arnalǵan. Alda Dragomırovka eldi mekeninde 120 oryndyq mekteptiń qurylysyn bastaýdy josparlap otyrmyz.
Oblys ortalyǵy mektepterindegi oryn tapshylyǵyn qysqartý maqsatynda 2026 jylǵa deıin 3,3 myń orynǵa arnalǵan 4 jańa mektep salynady», - deıdi Názir Jáshibekov.
Bilim berý nysandary sondaı-aq, kúrdeli jóndeýden ótedi. Byltyr 2,5 mlrd teńgege 31 mektep, onyń ishinde «Aýyl - el besigi» baǵdarlamasy boıynsha 21 nysan kúrdeli jóndeýden ótti. Ǵımarattardyń negizinen shatyry, terezeleri, jylytý júıesi aýystyryldy.
Bıyl 39 bilim berý nysany 3,8 mlrd teńgege kúrdeli jóndelmek.
Mektepterdiń materıaldyq-tehnıkalyq bazasyn kúsheıtý jóninde jumys jalǵaspaq. Ótken jyly 150 mln teńgege 28 fızıka jáne bıologııa pándik kabınetteri alynsa, bıyl onyń qatary taǵy 28 kabınetpen tolyqpaq.
«2020 jyldan bastap barlyq tolyq jınaqtalǵan Petropavl mektepterine - 48 bilim ordasyna jan basyna shaqqandaǵy qarjylandyrý tetigi engizildi. Bul óz qarjysyn óz betinshe jáne tıimdi basqarýǵa, qarjyny únemdeýge jáne eń mańyzdy qajettilikterge qaıta baǵyttaýǵa múmkindik berdi. Únemdelgen qarajat esebinen osy jyly qalalyq mektepterdiń materıaldyq-tehnıkalyq bazasyn nyǵaıtý, jóndeý júrgizý josparlanǵan», - deıdi basqarma basshysy.
