SQO-da bıyl 33 bala jol apatynan zardap shekken
PETROPAVL. QazAqparat – Soltústik Qazaqstan oblysynda bıyl 5 myńnan astam adam jolda júrý erejesin buzǵany úshin jazaǵa tartyldy. Jalpy jol-kólik oqıǵalary saldarynan 7 adam qaza taýyp, 51-i jaraqat aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Petropavlda oblys aýdandarynyń birinde turatyn 19 jastaǵy jigit Eýrazııalyq bazar mańynda E. Bóketov kóshesin ruqsat etilmegen jerden kesip ótkeni úshin jaýapqa tartyldy.
Bul jerde kólik aǵylyp jatyr, soǵan qaramastan qala turǵyndary óz ómirlerin qaterge tigip, jol ýchaskesin belgilenbegen jerden jıi kesip ótedi.
Polıtseıler kólik birden toqtamaıtynyn jáne júrgizýshiler kenetten paıda bolǵan adamdy baıqamaı qalýy múmkin ekendigin eske salady.
Máselen, jýyrda Karavannaıa kóshesin belgilenbegen jerden kesip ótken qala turǵyny zardap shekti. Qazir ol aýrýhanada em alyp jatyr.
«Ýaqyt únemdeımin dep, ómirinen ne densaýlyǵynan aıyrylýy múmkin. Osy bir qarapaıym eskertýdi joldy belgilenbegen jerden kesip ótetin barlyq jaıaý júrginshiler esterinen shyǵarmaǵan jón. Budan bólek, jolda apatty jaǵdaı jasaýy múmkin. Ásirese jolǵa jaqyn ósip turǵan jasyl jelekten nemese jol jıeginde toqtap turǵan kólikterdiń arasynan júgirip shyǵý asa qaýipti. Bıyl 33 bala zardap shekkenin atap ótken jón. Balalar joldaǵy júris-turysty eresekterden úırenedi. Eresekterdi erejelerdi buzbaı, jolda ózderin balalarǵa úlgi bolarlyqtaı ustaýǵa shaqyramyz», - deıdi SQO polıtsııa departamenti jergilikti polıtsııa qyzmeti basqarmasy bastyǵynyń orynbasary Aleksandr Rozbah.
Jalpy 9 aıdyń ishinde oblys joldarynda jaıaý júrginshilerdi qaǵyp ketýge baılanysty 49 jol-kólik oqıǵasy tirkeldi.
Saldarynan 7 adam qaza taýyp, 51-i jaraqat aldy. Onyń ishindegi 21 jol-kólik oqıǵasy jaıaý júrginshilerdiń kesirinen bolǵan.
Sondaı-aq SQO-da QR Ákimshilik quqyq buzý týraly kodeksiniń 615-baby boıynsha 5050 adam, onyń 3113-i oblys ortalyǵynda jaýapqa tartyldy.
