SQO-da bıyl 32 eldi mekendi taza sýmen qamtýǵa 9,1 mlrd teńge bólindi
PETROPAVL. QazAqparat – Soltústik Qazaqstan oblysynda aýyldardy taza sýmen qamtýǵa bıyl 40 paıyzǵa artyq qarajat bólindi, dep habarlaıdy QazAqparat tilshisi.
Soltústik Qazaqstan oblysyna «Óńirlerdi damytý – 2020» baǵdarlamasy aıasynda taza sýmen qamtýǵa bıyl respýblıkalyq qazynadan 9,1 mlrd teńge bólindi. Bul qarjy negizinen Esil aýdany men Tımırıazev aýdandaryndaǵy 26,5 myń turǵyny bar 32 eldi mekenge jumsalmaqshy. Búginde aýyldarda jumys qyzǵan, merdiger kompanııalar 135 shaqyrym torapty qys túskenshe tartyp bitirýi qajet.
Esil aýdanynyń Nıkolaevka aýylynda 1300-deı adam turady. Qazirgi tańda munda barlyq úılerdi ortalyqtandyrylǵan sýmen jabdyqtaý úshin sanatsııa ádisimen sý qubyryn tóseý jumystary júrgizilýde. Kezinde jer astynda qalǵan eski qubyrlarǵa jańa qubyrlar jalǵanyp, qudyqtar tazalanady.
«Eskige jańa qubyrlardy jalǵap qana qoımaı, sonymen qatar biz aýyl turǵyndaryna óz úılerine kóldeneń burǵylaý ádisimen sý qubyryn tartýǵa kómektesemiz. Onyń baǵasy metrine 3 myń teńge. Zeınetkerler men kóp balaly otbasylaryna jeńildigimiz bar. Tehnıkalyq qujattarǵa sáıkes aýylǵa 37 qudyq qoıamyz», - deıdi merdiger Vadım Grıgorev.
Osy kúnge deıin Nıkolaevka aýylynyń 15-ke jýyq otbasy óz úılerine sý kirgizdi. Solardyń biri Erbaı Ospanov. Ol buǵan deıin aýyz sýdy aýyl shetindegi munaradan 1 flıagisin 20 teńgege satyp alatyn. Al baqsha men maldy sýarý úshin aýlasyna uńǵyma ornatqan.
«Jalǵaǵandaryna 1 apta ǵana boldy, sýdy áli qosqan joq. Jıyrma jyldan artyq qıyndyq kórdik. Sýdyń endi úı ishinde bolatyndyǵyna qýanyp júrmiz», - deıdi aýyl aqsaqaly Erbaı Ospanov.
Respýblıkadan bólingen qarajatqa qosymsha oblys qazynasynan da 465 mln teńge osy salaǵa jumsalmaq. 208 shaqyrym sý torabyna aǵymdaǵy jóndeý júrgizilip, 28 myń turǵyny bar 41 aýyldyń sý máselesi sheshilmekshi. Bul jumystardyń nátıjesinde eldi mekenderdiń 62,4% ortalyqtandyrylǵan sý jelisine qosylady.
