SQO-da bıyl 3 myńnan astam bala lagerlerde tegin demalady
PETROPAVL. QazAqparat – Soltústik Qazaqstan oblysynda bıyl áleýmettik az qamtylǵan otbasylardan shyqqan, jetim jáne ata-ana qamqorlyǵynsyz qalǵan 3 myńnan astam bala jazǵy saýyqtyrý lagerlerinde tegin demalady. Osy maqsatqa bıýdjetten 78,5 mln teńge bólindi, dep habarlaıdy QazAqparat tilshisi.
SQO bilim basqarmasy baspasóz qyzmetiniń málimetinshe, óńirde balalardyń 12 jazǵy lageri bar. Bıyl bul demalys oryndary 7 myńǵa jýyq oqýshyny qabyldamaq. Onyń jartysyna jýyǵy tegin demalady.
«3081 oqýshy lagerlerde tegin demalady. Olar áleýmettik az qamtylǵan otbasylardan shyqqan, jetim jáne ata-ana qamqorlyǵynsyz qalǵan balalar. Bul maqsatqa bıýdjetten 78 mln 586 myń teńge bólindi. Onyń 10 mln teńgesi PTR test tapsyrýǵa jumsalady. Bıylǵy erekshelik – lagerde demalatyn balalar mindetti túrde PTR test tapsyrýlary kerek. Lagerge joldamany satyp alatyndar ony óz qarajatyna ótedi», - deıdi SQO bilim basqarmasynyń basshysy Gúlmıra Kárimova.
Balalardyń jazǵy saýyqtyrý lagerleri óńirde 15 maýsymnan bastap demalýshylardy qabyldaıdy. Jańa oqý jyly bastalǵanǵa deıin 5 aýysym bolady dep josparlanǵan. Joldama quny 18-38 myń teńge aralyǵynda. Al demalys lagerlerinde jumys isteıtin dárigerler mindetti túrde vaktsınatsııadan ótýleri tıis.
«Osy kúnge deıin ustazdardyń 60 %-y koronavırýsqa qarsy ekpe aldy. Demalys lagerlerine qabyldanatyn balalar sany óńirdiń epıdemıologııalyq ahýaldy baǵalaý matrıtsasyna táýeldi bolady. Eger «jasyl» aımaqta bolsaq 1400 bala qabyldanady. «Saryǵa» ótken jaǵdaıda - 700, al eger «qyzylǵa» kóshsek 420 bala ǵana lagerge barady», - deıdi Gúlmıra Kárimova.
Budan basqa SQO-dan 30 oqýshy «Býrabaı» respýblıkalyq ońaltý ortalyǵynda densaýlyǵyn túzep, demalmaq. Al 750 bala Petropavldaǵy «Solnechnyı» shıpajaıyna jiberiledi.
«1 maýsymnan bastap 45 myń bala úshin mektepterde demalys alańdary uıymdastyrylady. 18 myńnan astam bala úshin 351 bilim ordasynda jazǵy mektep jumys istep jatyr. 97 palatka lageri qurylyp, óńirdegi 312 klýb músheleri oblystyń sakraldy oryndaryna ekspedıtsııaǵa shyǵady. Oqýshylar saraıynda ádettegideı Jazǵy akademııa jumys isteıdi», - deıdi basqarma basshysy.
