SQO-da bıyl 3 myńǵa jýyq bozbala áskerge shaqyrý ýchaskelerine tirkeledi

PETROPAVL. QazAqparat – Soltústik Qazaqstan oblysynyń jergilikti áskerı basqarý organdarynda 2020 jyldyń kókteminde merzimdi áskerı qyzmetke shaqyrylatyn azamattardy aldyn ala zerdeleý bastaldy, dep habarlaıdy QazAqparat tilshisi.

SQO Qorǵanys isteri departamenti baspasóz qyzmetiniń habarlaýynsha, tirkeýdi jergilikti áskerı basqarý jáne tıisti jergilikti atqarýshy organdar birlesip ótkizedi. Maqsat - azamattardy áskerı esepke qoıa otyryp, olardyń sanyn, áskerı qyzmetke jaramdylyq dárejesin aıqyndaý, bilim jáne dene daıyndyǵy deńgeıin anyqtaý.

Áskerge shaqyrý ýchaskelerine tirkelýge jatatyn barlyq azamattar shaqyrtý qaǵazynda kórsetilgen qujattardy ózimen birge alyp, naqty belgilengen kúni shaqyrtý ýchaskelerine kelýi qajet.

«Áskerı qyzmet jáne áskerı qyzmetshilerdiń mártebesi týraly» Zań negizinde menshik nysanyna qaramastan, kásiporyndar, mekemeler, uıymdar, bilim berý uıymdarynyń basshylary áskerge shaqyrý ýchaskelerine tirkelýge jatatyn azamattardy qajetti ýaqytta bosatýǵa jáne olardyń Qorǵanys isteri jónindegi bólimge kelýin qamtamasyz etýge mindetti», - deıdi SQO Qorǵanys isteri departamentiniń baspasóz qyzmetshisi Aıman Ábjapbarova.

Medıtsınalyq komıssııa quramyna áskerı-dárigerlik saraptama máseleleri boıynsha daıyndyqtary bar bilikti dáriger mamandar, ıaǵnı, hırýrg, terapevt, nevropatolog, psıhıatr, kóz dárigeri, qulaq-muryn dárigeri, dermatovenerolog, tis dárigeri kiredi. Áskerge shaqyrýshylardyń árqaısymen jáne onyń ata-anasymen zerdeleýge jaýapty laýazymdy tulǵalar jeke áńgimelesý júrgizedi. 10 qańtar bastalǵan bul jumystar naýryz aıynyń sońyna deıin jalǵasady.

Áskerı tirkeý kezinde QR Qorǵanys mınıstrliginiń joǵary oqý oryndary men Kadet korpýsyna, basqa da áskerı oqý oryndaryna túsýge úgit-nasıhat jumystary júrgiziledi.

SQO boıynsha bıyl 17 jasqa tolatyn 3000-ǵa jýyq bozbala tirkeýden ótedi.