SQO-da bıyl 24 áıel sút bezi qaterli isiginen qaıtys boldy
SQO onkologııa ortalyǵynyń málimetinshe, sút beziniń obyry qaterli isikterdiń arasynda taralýy boıynsha birinshi orynda tur.
Ár onynshy áıel qater tobyna kiredi. Qazaqstanda jyl saıyn mundaı dıagnoz 5 myńǵa jýyq qyz-kelinshekke qoıylady. Al 1200-deı áıel osy qaterli dertten qaıtys bolady.
«2008 jyldan bastap Qazaqstanda qaterli sút bezi obyryn skrınıngteý baǵdarlamasy jumys istep keledi. Ol 40 pen 70 jas aralyǵyndaǵy áıelderdi qamtyǵan. Eldegi emhanalar men onkodıspanserler dertti erte bastan anyqtaý úshin tekserýden ótkizedi. Degenmen, naýqastardyń basym bóligi dárigerge derttiń aıqyn belgilerimen keledi, al bul aýrýmen kúresýde aıtarlyqtaı qıyndyq týǵyzady», - deıdi SQO kópsalaly aýrýhananyń onkologııalyq ortalyq onkomammology Rafael Rızaev.
Mamannyń aıtýynsha, óńirdiń jáne elimizdiń barlyq medıtsınalyq mekemelerinde 15 qazanda sút bezi obyryn anyqtaý jáne derttiń aldyn alý maqsatynda Ashyq esik kúni ótedi.
«Áıelderdi keshendi tekserýden jáne skrınıngten ótýge shaqyramyz. Eń qarapaıym ádis – ózin-ózi tekserý. Árbir áıel tańerteń tura salyp, dýshqa túspes buryn, keýdesin palpatsııalap ózin-ózi tekserýi tıis. Eger ol qandaı da bir patologııalyq erekshelikti anyqtaǵan bolsa, odan ári dıagnostıkalaý úshin mammologpen keńeskeni abzal», - deıdi Rafael Rızaev.
SQO-da jyl saıyn jańadan 200-210 áıelde sút beziniń qaterli isigi anyqtalady. Bıyl jyl basynan beri 24 áıel osy dertten qaıtys bolǵan.
Foto: lempaala.fi