SQO-da bıyl 21 orman órti tirkelip, 75,6 ga aýmaq jandy

PETROPAVL. QazAqparat – Soltústik Qazaqstan oblysynda bıyl 21 orman órti tirkeldi. Jalyndy aýyzdyqtaýǵa 500-den astam tehnıka, myńnan astam maman at salysty, dep habarlaıdy QazAqparat tilshisi.

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, óńirde memlekettik orman qorynyń 550 myń gektary 12 memlekettik orman ıelenýshiniń qaramaǵyna berilgen. Bul alqaptyń 414, 2 myń gektary ormanmen kómkerilgen.

«Ormanshy-ınspektorlarǵa 354 aýmaq bekitilgen, olar munda bárin qadaǵalap otyrýy kerek: aǵashtardyń aýrýy men zııankesteri, janýarlardyń kóship-qonýy, ósimdikterdiń gúldeýi nazardan tys qalmaıdy. Eń bastysy – ormandarda quqyq buzýshylyqtarǵa jol bermeý.

Órt qaýpi bar maýsymnyń basynan, ásirese kóktemde órt kóbeıedi. Kóbine qurǵaq shóp pen byltyrǵy qamys, egistikterdegi qalǵan saban órtenip jatady. Sóndirilmegen sirińke, temeki tuqyly, tipti bótelkeniń synyǵy bolsyn, órtke ákelýi múmkin.

Orman negizinen demalýǵa kelgen qonaqtardan zardap shegedi, olar qoqys qaldyrady, sóndirilmegen temeki tuqylyn laqtyrady, jıi mas kúıinde ot jaǵady», - deıdi basqarmanyń bólim statısi Sáýle Súleımenova.

Bıyl oblys aýmaǵynda ot 147 ret tutanǵan, onyń 21-i orman órtine ulasqan. Órtpen kúreske 500-den astam tehnıka, 1 100-den astam adam jumyldyryldy.