SQO-da bıyl 21 avtokólik órtengen
PETROPAVL. QazAqparat - Soltústik Qazaqstan oblysynda jyl basynan beri 21 kólik órtengen. Ótken demalysta óńirde osyndaı eki oqys oqıǵa tirkelip, eki mashına janyp ketti, dep habarlaıdy QazAqparat tilshisi.
Oblystyq Tótenshe jaǵdaı departamenti mamandarynyń aıtýynsha, eki kóliktegi de órt symdardyń qysqa tuıyqtalýynan bolǵan. Áıteýir, adamdar zardap shekpegen. Jalpy, jyl basynan avtokólik órtinen 2,5 mln teńge shyǵyn kelgen eken.
Órttiń jıileýine baılanysty búgin óńirlik kommýnıkatsııalar qyzmetinde SQO Tótenshe jaǵdaılar departamenti bastyǵynyń orynbasary Nurlan Atyǵaevtiń qatysýymen brıfıng ótti. Nurlan Baýyrjanulynyń aıtýynsha, jyl basynan óńirde 198 órt tirkelgen. Odan 28 mln teńge shyǵyn kelgen. Byltyr osy aralyqta 9 adam qaza tapsa, bıyl 16 turǵyn mert bolǵan.
«Sáýirdiń 19-21-i aralyǵynda Petropavlda, Aıyrtaý jáne Mamlıýt aýdandarynda órtten 4 adam qaza tapty. Órttiń shyǵýyna peshti, elektrqondyrǵylaryn durys paıdalanbaý, qarapaıym qaýipsizdik erejelerin saqtamaý sebep bolyp jatady. Sondaı-aq barlyq órttiń 80% jeke sektordaǵy turǵyn úılerde bolǵan», - deıdi Nurlan Atyǵaev.
Onyń aıtýynsha, sońǵy kezderi qoqys pen qýraǵan shóptiń órtenýine qatysty shaqyrtý kóbeıgen.
«Sáýirdiń 1-inen bastap qoqys pen qýraǵan shóptiń órtenýine baılanysty 103 shaqyrtýǵa shyqtyq. Ótken aptada osyndaı 49 oqıǵa tirkeldi. Sol sebepti, turǵyndardy órt qaýipsizdigi erejelerin qatań saqtaýǵa shaqyramyn», - deıdi Nurlan Baýyrjanuly.
