SQO-da bıyl 189 aýyldyń joly jaqsarady
Búgin SQO ákimdiginiń kezekti otyrysy onlaın túrde ótip, onda joldardy jóndeý máselesi qaraldy. Oblys ákimi Qumar Aqsaqalovtyń aıtýynsha, 95 myńnan astam adam turatyn 133 eldi mekenniń jol sapasy jaqsardy. Jalpy sońǵy úsh jylda óńirde osy maqsatqa 92,5 mlrd teńge jumsalǵan. Bıyl da atqarylar jumys aýqymdy.
«Aqqaıyń, Esil, Qyzyljar jáne Taıynsha aýdandarynda jol jóndeldi. Bıyl Mamlıýtka qalasyna deıingi jol qurylysy bitedi. Kýrortty aımaq – Aıyrtaý aýdanynda da biraz jumys atqaryldy. Saýmalkóldiń ózinde 18 kóshe jóndeldi. Kezekte Aqjar, Tımırıazev, Ýálıhanov, Jambyl aýdandary tur. Bıyl da úlken jumys atqarylady. 39,1 mlrd teńgege 135 myń adamy bar 189 aýyldyń 770 shaqyrym joly jóndeledi. Biraq, bul jumystardyń sapaly atqarylýyn nazarda ustaýymyz kerek. Úkimettik emes uıymdar, aýyl turǵyndary, jol zerthanasy, taǵy basqalar baqylaýda ustap otyrýlary tıis», - dedi Qumar Aqsaqalov.
SQO ákiminiń aıtýynsha, 74 eldi mekenniń aýylishilik joly qalpyna keltiriledi. Ásirese, aýyl turǵyndary bul jumystan shet qalmaýy tıis.
«Atqarylyp jatqan jumysqa kóńili tolmasa, sapasyna kúmán keltirilse, arnaıy zerthana mamandaryn shaqyrtý qajet. Bıyl jol zerthanalaryna 60 mln teńge bóldik. Óz jumysyna atústi qaraıtyndardyń jolyn kesý qajet. Qurylysqa paıdalanatyn materıaldyń deni jergilikti bolýy shart. Bıyl 4,5 myń adam maýsymdyq eńbekke tartylady», - dedi oblys ákimi jıyn barysynda.
Birinshi kezekte on jyldap jóndeý kórmegen aýdan ortalyqtary joldarynyń sapasy artady. Sondaı-aq Qumar Aqsaqalov joldyń boıyndaǵy servıstik qyzmet, dámhanalardaǵy sanıtarlyq jaǵdaıdy da qozǵady. Oblys aýmaǵyndaǵy jol boıynda 135 nysan bolsa, sonyń 70% ulttyq standartqa saı kelmeıdi. Óńir basshysy aýdan ákimderine jaǵdaıdy túzetýdi tapsyrdy.
