SQO-da bıyl 148 adam maskúnemdikten májbúrlep emdeýge jiberildi

PETROPAVL. QazAqparat – Soltústik Qazaqstan oblysynda ýchaskelik polıtseıler otbasy shyrqyn buzǵan 148 adamdy maskúnemdikten emdelýge májbúrlep jiberdi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 14 tamyzdan bastap 30 qyrkúıekke deıin soltústikqazaqstandyq polıtseıler «Ýchaske» jedel-profılaktıkalyq is-sharasy aıasynda jumys istep jatyr. Maqsat – qylmys pen quqyq buzýshylyqtyń aldyn alý, zańsyz kóshi-qonnyń jolyn kesý, shetel azamattarynyń tarapynan Qazaqstan aýmaǵynda bolý erejeleriniń buzylýyn anyqtaý. Ýchaskelik ınspektorlar, jedel ýákilder, kóshi-qon qyzmetiniń qyzmetkerleri, patrýldik jáne ıývenaldyq polıtseıler – is-sharaǵa barlyq qyzmet pen bólinister jumyldyrylǵan.

Mobıldik toptar kezeń-kezeńimen ákimshilik ýchaskelerdegi aýlalar men páterlerdi tekseredi. Shetel azamattary ǵana emes, polıtsııada túrli esepterde turǵan jáne buryn sottalǵan tulǵalar da nazardan tys qalmaıdy. Budan bólek, azamattyq qarý ıelerin tekserý, jasóspirimder arasynda jáne turmysy nashar otbasylardaǵy quqyq buzýshylyqtardy eskertý boıynsha reıdtik is-sharalar da jandandyryldy.

Jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbahtyń aıtýynsha, jyl basynan oblysta ýchaskelik polıtsııa ınspektorlary 148 adamdy maskúnemdikten májbúrlep emdeýge jibergen. Qaıtalap qylmys jáne quqyq buzýshylyqtar jasamaý úshin 438 adamǵa qatysty alkogoldik ishimdikter ishpeý jáne basqa da birqatar shekteýdi kózdeıtin erekshe talaptar qoıyldy. Sondaı-aq polıtseılerdiń ótinishi boıynsha sot organdary shartty túrde jazasyn ótep júrgen 29 adamdy bas bostandyǵynan aıyrý oryndaryna qaıtardy.