SQO-da bıyl 136 adam ózine qol jumsady, onyń bireýi - jasóspirim

PETROPAVL. QazAqparat – Soltústik Qazaqstan oblysynda psıhıkalyq densaýlyq ortalyǵy «Oblys turǵyndary arasynda aýtodestrýktıvti minez-qulyqtyń aldyn alý boıynsha vedomstvoaralyq ózara is-qımyl jáne jumys qorytyndylary» atty dóńgelek ústel ótkizdi. Oǵan múddeli memlekettik mekeme ókilderi jáne úkimettik emes uıymdar qatysty, dep habarlaıdy QazAqparat tilshisi.

Psıhıkalyq densaýlyq ortalyǵy jasóspirimdermen jáne olardyń ata-analarymen sýıtsıdtiń aldyn alýda keshendi jumystar júrgizip jatyr.

Bıyl densaýlyq saqtaý, bilim basqarmalary men jergilikti polıtsııa qyzmeti arasynda SQO halqynyń barlyq jas sanattary arasynda aýtodestrýktıvti minez-qulyqtyń aldyn alý boıynsha sharalar keshenin iske asyrý jónindegi óńirlik jospar quryldy.

Kúrdeli sýıtsıdologııalyq jaǵdaıy bar aýdandardy anyqtaý maqsatynda aı saıyn monıtorıng júrgiziledi.

Oblys boıynsha sýıtsıdologııalyq jaǵdaıdy salystyrmaly taldaý Jambyl, Aqqaıyń, M.Jumabaev, Ǵ.Músirepov atyndaǵy aýdandarda daǵdarys jaǵdaıynda jasóspirimderdiń minez-qulqynda óz-ózine qol jumsaýdyń joǵary qaýpi saqtalyp otyrǵanyn kórsetti. 2021 jyldyń 10 aıynyń qorytyndysy boıynsha eresekter arasynda 135 sýıtsıd, kámeletke tolmaǵandar arasynda aıaqtalǵan sýıtsıdtiń 1 jaǵdaıy tirkeldi. 2020 jyldyń 12 aıynyń qorytyndysy boıynsha eresekter arasynda 199 aıaqtalǵan sýıtsıd jáne kámeletke tolmaǵandar arasynda 6 oqıǵa tirkeldi», - deıdi - deıdi psıhıkalyq densaýlyq ortalyǵy dırektory Dáýrenbek Beısenbaev.

Bıylǵy 10 aıdyń qorytyndysy boıynsha eresekter arasynda 233 sýıtsıd áreketi jáne jasóspirimder arasynda 13 oqıǵa tirkeldi.

Sonyń ishinde 7-i Petropavlda, 6-y aýdandarda bolǵan.

Byltyr eresekter 251 ret ózine qol-jumsamaq bolsa, kámeletke tolmaǵandar arasynda osyndaı 15 jaǵdaı, Petropavlda 8 jaǵdaı, aýdandar boıynsha 7 jaǵdaı tirkelgen.

Óńirde mobıldi top jumys isteıdi, onyń quramyna psıholog, áleýmettik pedagog, quqyq qorǵaý organdary men prokýratýra ókilderi kiredi.

Mamandar jasóspirim ózine qol jumsaýǵa áreket etken otbasylar men oqý oryndaryna baryp, aldyn alý jumystaryn júrgizedi.

Mamandar balalarmen kezdesedi jáne áńgimeler júrgizedi, ata-analarǵa keńes beredi. Osy jyly qazan-qarasha aılarynda 4 jasóspirim ortalyqta statsıonarlyq em aldy.

«Jyl basynan ortalyqqa 65 jasóspirim kelip, kómek aldy. Olardy dári-dármekpen emdedik, psıholog 88 túzeý sabaqtaryn ótkizdi. Ata-analarymen 42 kezdesý ótti. Kóp jaǵdaıda jasóspirimderde teris emotsıonaldy kúı ata-anamen jáne qurdastarymen til tabyspaǵanda, qaqtyǵys aıasynda paıda bolady», - deıdi Dáýrenbek Beısenbaev.

Mamandardyń aıtýynsha, psıhologııalyq kómek kerek bolǵan jaǵdaıda 8 771 029 28 99 senim telefonyna habarlasýǵa bolady.

Sondaı-aq ortalyqtyń áleýmettik jelidegi resmı paraqshasynda qajetti aqparat jarııalanǵan.