SQO-da bıyl 125 kópbalaly otbasy baspanaly boldy
PETROPAVL. QazAqparat – Soltústik Qazaqstan oblysynda bıyl kezekke turǵandardyń 625-i baspanaly bolsa, solardyń 125-i kópbalaly otbasylar, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, búginde Petropavlda kóp qabatty 32 baspana salynyp jatyr. Olardyń basym bóligi tozyǵy jetken úılerdiń ornynda paıda bolady. Oblys ortalyǵynda osy maqsatta «Jańa qala» atty baǵdarlama qabyldanǵan. Nátıjesinde 3 jylda qalanyń kórkin buzǵan 1,2 myń eski úı buzyldy.
«Oblysta birinshi synypqa baratyn balalardyń sany jyldan-jylǵa artyp keledi. 2018 jyly 7,7 myń bala mektep tabaldyryǵyn attasa, keler jyly olardyń sany 8,5 myńǵa jetpek. Sondyqtan, baspanalardyń qurylysymen qatar jańa mektepter de salynyp jatyr. Tek sońǵy 2 jylda oblysta 1,8 myń oryndyq 3 jańa mektep paıdalanýǵa berildi. Ýálıhanov kóshesinde 900 oryndyq taǵy bir mekteptiń qurylysy júrip jatyr. Biz qalanyń osy bóliginiń turǵyndary úshin zamanaýı sport saraıy men ádemi saıabaq salamyz», - deıdi SQO ákimi Qumar Aqsaqalov.
Petropavlda kommertsııalyq baspana qurylysy da qarqyn alǵan. Oblys ortalyǵynda 3 jyl buryn osyndaı bir úı ǵana boı kóterse, búginde 14 kópqabatty úı baspana salynyp jatyr.
«7-20-25 baǵdarlamasy júzege asyryla bastaǵannan beri 5 mlrd teńgege 675 ótinim maquldandy. ıAǵnı 675 otbasy ıpoteka arqyly tómen paıyzdyq mólsherlememen turǵyn úı jaǵdaıyn jaqsarta aldy. Bıyl 300 myń sharshy metr baspanany paıdalanýǵa bersek, keler jylǵa ony taǵy 100 myń sharshy metrge arttyrýdy josparlap otyrmyz», - deıdi óńir basshysy.
Jalpy bıyl SQO-da 3 myń páter qoldanysqa berilse, sonyń 625-i áleýmettik az qamtylǵan otbasylarǵa buıyrdy. Onyń ishinde kópbalaly 125 otbasy da bar.
